నెల్లూరు జిల్లాలో మత్స్యకారుని ఇంట్లో చంద్రబాబు భోజనం

నెల్లూరు జిల్లా కావలి మండలం తుమ్మలపెంట గ్రామంలో CM చంద్రబాబు నాయుడు మత్స్యకారుని ఇంట్లో భోజనం చేశారు. స్థానికంగా నిర్వహించిన 'మత్స్యకార సేవలో' కార్యక్రమంలో పాల్గొన్న తర్వాత ఆయన స్థానిక మత్స్య మార్కెట్‌ను సందర్శించారు.

మార్కెట్‌లో మత్స్యకారుడు తానంగారి బాబు మరియు ఆయన కుమారుడు గిరి CM కు స్వాగతం పలికారు. జీవనోపాధి, చేపల వేట, మార్కెట్‌లో విక్రయాలు, స్థానిక చేపల రకాల గురించి చంద్రబాబు తానంగారి బాబుతో మాట్లాడారు.

మత్స్యకార సేవలో పథకం ద్వారా ఏటా ₹20,000 ఆర్థిక సహాయం అందుతోందని, ఇది తమ కుటుంబానికి ఉపయోగపడుతోందని తానంగారి బాబు CM కు తెలిపారు.

ఆ తర్వాత మహిళా వ్యాపారుల వద్ద చేపలు కొని తానంగారి బాబు ఇంటికి వెళ్లారు చంద్రబాబు. ఆయన భార్య వెంకమ్మ చేపల పులుసు వండే సమయంలో CM అక్కడే నిలబడి కొంతసేపు వంటలో పాల్గొన్నారు. అనంతరం ఆ కుటుంబ సభ్యులతో కలిసి నేలపై కూర్చుని భోజనం చేశారు.