పార్టీ నియమాలు ఉల్లంఘించిన టీడీపీ ఎమ్మెల్యేలకు చంద్రబాబు హెచ్చరిక

టీడీపీ అధ్యక్షుడు, ఆంధ్రప్రదేశ్ ముఖ్యమంత్రి చంద్రబాబు నాయుడు పార్టీ నియమాలు ఉల్లంఘించిన కొంతమంది ఎమ్మెల్యేలకు కఠిన హెచ్చరికలు జారీ చేశారు. పార్టీ లైన్ దాటితే కఠిన చర్యలు తప్పవని స్పష్టం చేశారు.

గతంలో కొంతమంది ఎమ్మెల్యేలతో వ్యక్తిగతంగా మాట్లాడి హెచ్చరించినా కొందరు మార్పు చెందలేదని పార్టీ వర్గాలు తెలిపాయి. ఈ నేపథ్యంలో దారి తప్పిన ఎమ్మెల్యేల విషయంలో రాష్ట్ర అధ్యక్షుడు పల్లా శ్రీనివాస్‌కు చంద్రబాబు బాధ్యతలు అప్పగించారు.

పల్లా శ్రీనివాస్ తాజాగా బొండా ఉమా, అఖిల ప్రియ తదితర ఎమ్మెల్యేలను పిలిచి చర్చించారు. పార్టీ సిద్ధాంతాలను ఎవరు విస్మరించినా ఉపేక్షించబోమని వారిని హెచ్చరించారు.

అదే సమయంలో చంద్రబాబు 2029 ఎన్నికల దిశగా పార్టీ ప్రచారాన్ని ముమ్మరం చేశారు. ‘ఇంటింటికీ టీడీపి’ కార్యక్రమం ద్వారా ప్రజల్లోకి వెళ్లాలని ఎమ్మెల్యేలను ఆదేశించారు. హద్దు మీరిన వారిపై కఠిన చర్యలు ఉంటాయని హైకమాండ్ సంకేతాలు ఇచ్చింది.