అరాచకాలను సహించేది లేదని సీఎం చంద్రబాబు హెచ్చరిక.. ‘గొడ్డలి తరం’ అని వైసీపీపై విమర్శ

వైసీపీ నేతల అరాచకాలను ఏపీ ప్రభుత్వం ఏ పరిస్థితిలోనూ ఉపేక్షించదని సీఎం చంద్రబాబు నాయుడు స్పష్టం చేశారు. ఒక తరాన్ని నాశనం చేసిన వ్యవహారశైలితో వ్యవహరిస్తున్నారని, వారు ‘జెన్‌ జీ’ కాదు ‘గొడ్డలితో కొట్టే’ తరం అని ఆయన వ్యాఖ్యానించారు. వైసీపీ అధినేత జగన్‌మోహన్ రెడ్డిని ఉద్దేశించి ‘ఆయన గొడ్డలి బ్యాచ్‌’ అని అన్నారు.

ఇటీవల ఓ మాజీ మంత్రి కుమారుడు చేసిన ప్రమాదం ఘటనను సీఎం ప్రస్తావించారు. ప్రమాదం తర్వాత బాధితుడిని ఆసుపత్రికి తీసుకెళ్లకపోగా, తన కుమారుడిని కాపాడుకునేందుకు మాజీ మంత్రి వేరే వారిపై కేసు పెట్టించారని, అసలు బాధ్యత నుంచి తప్పించుకున్నారని ఆరోపించారు.

నేరాలు, గంజాయి, బ్లేడ్ బ్యాచ్‌లకు ప్రోత్సాహం ఇస్తున్నారని సీఎం మండిపడ్డారు. ఇకపై తప్పుడు పనులు చేస్తే కఠిన చర్యలు ఉంటాయని హెచ్చరించారు. రాష్ట్రవ్యాప్తంగా సీసీటీవీ కెమెరాలు ఏర్పాటు చేశామని, నేరాలను నిరోధించేందుకు ‘మూడో నేత్రం’ పనిచేస్తుందని తెలిపారు.