యోగాంధ్ర 2025: కృష్ణా నది బైపాస్ రోడ్డుపై 25 వేల మందితో యోగా కార్యక్రమం

ముఖ్యమంత్రి చంద్రబాబు నాయుడు యోగాంధ్ర 2025 కార్యక్రమం వివరాలను వెల్లడించారు.

అంతర్జాతీయ యోగ దినోత్సవం సందర్భంగా అమరావతిలోని కృష్ణా నది వెస్ట్ బైపాస్ రోడ్డుపై 25,000 మంది పాల్గొనేలా ఈ కార్యక్రమాన్ని నిర్వహించనున్నారు. ప్రతి జిల్లా కేంద్రంలోనూ ప్రత్యేక థీమ్‌తో కనీసం 2,000 మందితో యోగా సెషన్లు జరుగుతాయి. అదే రోజు అన్ని ప్రాంతాల్లో ఒకే సమయానికి, ఒకే విధమైన యోగా ప్రాక్టీస్ ఉంటుందని సీఎం తెలిపారు.

శ్రీశైలం వంటి చారిత్రక ప్రాంతాలు, 24 ప్రధాన దేవాలయాలతో సహా 56 పర్యాటక కేంద్రాల్లోనూ యోగా కార్యక్రమాలు ఏర్పాటు చేస్తున్నారు. గ్రామం, మండలం, జిల్లా, రాష్ట్ర స్థాయిలలో నాలుగు దశల పోటీలు నిర్వహిస్తారు. రాష్ట్ర స్థాయి గ్రాండ్ ఫైనల్ అమరావతిలో జరుగుతుంది.

యువత, మహిళలు, విద్యార్థుల్లో యోగా పట్ల ఆసక్తి పెంచేందుకు ప్రత్యేక కార్యక్రమాలు రూపొందించారు. గర్భిణీ స్త్రీలకు యోగా ద్వారా సురక్షితమైన ప్రసవం సాధ్యమయ్యేలా శిక్షణ ఇస్తారు. సలహాదారు సత్యనారాయణరాజు 21 రకాల వ్యాధులకు ప్రత్యేకంగా రూపొందించిన 15-20 నిమిషాల యోగా వ్యాయామాలను అందుబాటులో ఉంచుతారు.

రాష్ట్ర ప్రభుత్వం 10 లక్షల మంది సర్టిఫైడ్ యోగా సాధకులను తయారు చేయాలనే లక్ష్యంతో ఈ ఏడాది 2.5 లక్షల మందికి శిక్షణ ఇవ్వనుంది. ప్రతి ఒక్కరికీ రేటింగ్ ఇచ్చి, సంజీవని ఆరోగ్య పథకంతో అనుసంధానం చేస్తారు. తద్వారా వారిని యోగా శిక్షకులుగా ఉపయోగించుకునే అవకాశం కల్పిస్తారు. ఈ మొత్తం కార్యక్రమం అంతర్జాతీయ యోగ దినోత్సవం ప్రోటోకాల్‌ను అనుసరిస్తుంది.