పంట వ్యర్థాలు తగలబెట్టే క్రమంలో దంపతుల మృతి — జయశంకర్ భూపాలపల్లి

జయశంకర్ భూపాలపల్లి జిల్లా రేపాకపల్లె గ్రామానికి చెందిన రైతు చంద్రమౌళి తన పొలంలో వరిగడ్డి తగలబెట్టే క్రమంలో మంటలు వేగంగా విస్తరించాయి. మంటలు అదుపు చేయడానికి ప్రయత్నించిన చంద్రమౌళి అక్కడికక్కడే మరణించారు.

భర్తను రక్షించేందుకు వెళ్లిన భార్య భాగ్య (55) కూడా మంటల్లో చిక్కుకున్నారు. స్థానికులు ఆమెను ఆస్పత్రికి తరలించారు. చికిత్స పొందుతూ ఆమె కూడా మృతి చెందారు.

ఈ దంపతులకు ముగ్గురు పిల్లలు ఉన్నారు. ముగ్గురికీ వివాహాలు జరిగాయి. గత వారం రోజుల్లో పంట వ్యర్థాలు తగలబెట్టడం వల్ల నలుగురు రైతులు ప్రాణాలు కోల్పోయారని నివేదికలు తెలుపుతున్నాయి.

ఎండాకాలంలో వడగాల్పుల కారణంగా మంటలు అంచనాకు మించి వేగంగా విస్తరిస్తాయని వ్యవసాయ నిపుణులు హెచ్చరిస్తున్నారు. పంట వ్యర్థాలు తగలబెట్టేటప్పుడు రైతులు అధిక జాగ్రత్తలు తీసుకోవాలని అధికారులు విజ్ఞప్తి చేస్తున్నారు.