వరికొయ్యల మంటల్లో రైతు సజీవ దహనం — కాపాడేందుకు వెళ్లిన భార్య మృతి

జయశంకర్ భూపాలపల్లి జిల్లా రేగొండ మండలం రేపాకపల్లి గ్రామంలో దారుణమైన ఘటన చోటు చేసుకుంది. రైతు చంద్రమౌలి తన పొలంలో వరికొయ్యలకు నిప్పు పెట్టాడు.

ఆ మంటలు పక్క పొలంలోకి వ్యాప్తి చెందాయి. వాటిని ఆర్పేందుకు పరుగెత్తిన చంద్రమౌలి మోకాళ్ల నొప్పుల వల్ల పడిపోయాడు. లేవలేని స్థితిలో ఆ మంటల్లో సజీవ దహనమయ్యాడు.

భర్త కాలిపోవడాన్ని చూసిన భార్య భాగ్యమ్మ అతన్ని కాపాడేందుకు ప్రయత్నించింది. ఆ క్రమంలో ఆమెకు తీవ్రమైన కాలిన గాయాలయ్యాయి. వరంగల్ ఆసుపత్రికి తరలిస్తుండగా మార్గమధ్యలో గుండెపోటుతో మృతి చెందింది.

ఒకే రోజు భార్యాభర్తలు ఇద్దరూ చనిపోయారు. రెండు మృతదేహాలు ప్రభుత్వ మార్చురీలో ఉన్నాయి. భూపాలపల్లి MLA గండ్ర సత్యనారాయణరావు మృతదేహాలను సందర్శించి కుటుంబ సభ్యులను ఓదార్చారు.

పంట వ్యర్థాలను కాల్చడం వల్ల భూసారం పోవడంతో పాటు ప్రాణాంతక ప్రమాదాలు జరుగుతున్నాయని అధికారులు హెచ్చరించారు. ఇలాంటి పనులకు పూనుకోవద్దని కోరారు.