చీలపల్లి దొంగతనం కేసు: ఒకే కుటుంబానికి చెందిన నిందితుల అరెస్టు, బంగారు ఆభరణాలు స్వాధీనం

మెదక్ జిల్లా పెద్దశంకరంపేట మండలం చీలపల్లిలో జరిగిన దొంగతనం కేసును పోలీసులు చేధించారు. మెదక్ జిల్లా SP శ్రీనివాసరావు మీడియాకు వివరాలు తెలిపారు.

నిందితులు ఒకే కుటుంబానికి చెందినవారని SP వెల్లడించారు. సంగారెడ్డి జిల్లా సిర్గాపూర్ మండలం విద్యా నాయక్ తండాకు చెందిన జయరామ్ నాయక్ తన కుటుంబ సభ్యులతో కలిసి ఈ దొంగతనాలకు పాల్పడినట్లు పోలీసులు తెలిపారు. నిందితుడి తల్లి మాలిబాయిని అరెస్టు చేశారు. జయరామ్ నాయక్ బావ ఇప్పుసింగ్ ఇంకా పరారీలో ఉన్నాడు.

నిందితుల వద్ద నుండి సుమారు 1 కిలో బంగారు ఆభరణాలు, 1 కిలో 7 గ్రాముల వెండి ఆభరణాలు స్వాధీనం చేసుకున్నారు. ఈ నెల 14వ తేదీ అర్ధరాత్రి చీలపల్లి గ్రామంలో ఐదు ఇళ్లలో దొంగతనం జరిగింది. ఈ కేసులో మూడు దొంగతనాలు జరిగాయి, రెండు ప్రయత్నాల దశలో ఉన్నాయి.

మెదక్, కామారెడ్డి, నిజామాబాద్ జిల్లాల్లో ఈ నిందితులపై మొత్తం 17 కేసులు నమోదయ్యాయి. పరారీలో ఉన్న ఇప్పుసింగ్ వద్ద మరింత బంగారం ఉందని పోలీసులు అనుమానిస్తున్నారు. అతని కోసం గాలింపు చర్యలు కొనసాగుతున్నాయి.