చెన్నూరు గురుకుల కాలేజీలో విద్యార్థుల ఫిర్యాదులు: ప్రిన్సిపల్, లెక్చరర్లపై బదిలీ వేటు

మంచిర్యాల జిల్లా చెన్నూరు మండలంలోని మహాత్మ జ్యోతిబా పూలే బీసీ వెల్ఫేర్ గురుకుల కళాశాలలో విద్యార్థులు ఎదుర్కొంటున్న సమస్యలపై అధికారులు స్పందించారు. ప్రిన్సిపల్ అశోక్‌తో పాటు ముగ్గురు లెక్చరర్లపై బదిలీ వేటు వేశారు. వాచ్మన్‌ను కూడా విధుల నుంచి తొలగించారు.

17 మంది విద్యార్థులు ఇటీవల మంచిర్యాల ఎమ్మెల్యే ప్రేమ్ సాగర్ రావు నివాసానికి వెళ్లి, ఆయన సతీమణికి తమ సమస్యలు వివరించారు. హాస్టల్‌లో సరైన వసతి, భోజనం లేదని, సిబ్బంది తమను పట్టించుకోవడం లేదని వారు ఫిర్యాదు చేశారు.

ఈ ఘటనపై 10TV లో వరుస కథనాలు ప్రసారం కావడంతో జిల్లా కలెక్టర్, బీసీ వెల్ఫేర్ సెక్రటరీ స్పందించారు. సంబంధిత రికార్డులు పరిశీలించి, నిర్లక్ష్యానికి పాల్పడినట్లు నిర్ధారించి ప్రిన్సిపల్, ముగ్గురు లెక్చరర్లపై బదిలీ వేటు వేశారు.

ప్రస్తుతం విద్యార్థులను తాత్కాలికంగా తల్లిదండ్రుల వద్దకు పంపించి, సౌకర్యాలు మెరుగుపడే వరకు ఇంటి వద్దే ఉండాలని సూచించారు. దూర ప్రాంతాల విద్యార్థులను కొంత సిబ్బందితో ఇంటికి చేర్చారు. జిల్లా కలెక్టర్ మెరుగైన భోజనం, ఇతర సౌకర్యాలు కల్పించి, ఎప్పటికప్పుడు పర్యవేక్షిస్తామని హామీ ఇచ్చారు.

ఇదే సమయంలో, కొమరం భీమ్ జిల్లా కెరిమెరి ప్రాంతంలోని ఐటీడీఏ ఆశ్రమ పాఠశాలలో కూడా ఇలాంటి సమస్యలపై విద్యార్థులు ధర్నా చేయడంతో ఆరుగురు సిబ్బందిపై బదిలీ వేటు వేశారు. ఈ ఘటనపై విచారణ కమిటీని నియమించినట్లు సమాచారం.