ఛత్తీస్‌గఢ్ యువతి 19 ప్రభుత్వ పరీక్షలు క్లియర్ చేసి CAG ఆడిట్ ఆఫీసర్‌గా నియమితురాలు

ఛత్తీస్‌గఢ్‌కు చెందిన ఓ యువతి స్వీయ అధ్యయనంతో 19 ప్రభుత్వ ఉద్యోగ పరీక్షలను ఒకేసారి క్లియర్ చేసి, కంప్ట్రోలర్ అండ్ ఆడిటర్ జనరల్ (CAG) కార్యాలయంలో అసిస్టెంట్ ఆడిట్ ఆఫీసర్‌గా నియమితులయ్యారు. 21 ఏళ్ల వయసులోనే తొలి ప్రయత్నంలోనే ఈ విజయం సాధించారు. ఆమె SSC, రైల్వే సహా వివిధ రంగాల ఉద్యోగాలకు సంబంధించిన పరీక్షలు రాశారు. ఇటీవల ఓ ఇంటర్వ్యూలో మాట్లాడుతూ, తన విజయ రహస్యాన్ని వెల్లడించారు. ఆమె ప్రకారం, SSC వంటి పరీక్షల సిలబస్ ఎక్కువగా ఒకేవిధంగా ఉంటుంది. రైల్వే పరీక్షలకు కొన్ని అదనపు టాపిక్లు చేర్చుతారు. కానీ ఏదో ఒక ప్రభుత్వ శాఖలో ఉద్యోగం సాధించాలనే లక్ష్యంతో, అదనపు టాపిక్లు కూడా క్షుణ్ణంగా చదివానని చెప్పారు. అన్ని పరీక్షల్లో కీలకమైన అంశం టైమ్ మేనేజ్మెంట్ అని ఆమె తెలిపారు. ‘సమయం సరిగ్గా నిర్వహించడం వల్లే ఒకేసారి అనేక పరీక్షలు రాసినా, నిర్దేశిత సమయంలో సమాధానాలు రాయగలిగాను’ అని వివరించారు. స్వీయ అధ్యయనంతోనే ఈ ఘనత సాధించిన ఈ యువతి, కష్టపడితే సాధించలేనిది ఏదీ లేదని నిరూపించారు. ప్రస్తుతం ఆమె CAG కార్యాలయంలో విధులు నిర్వర్తిస్తున్నారు. పలువురు యువతీ యువకులకు ఆమె స్ఫూర్తిగా నిలిచారు.