హైదరాబాద్‌లో చికెన్, గుడ్ల ధరలు ఒక్కసారిగా పెరిగాయి

హైదరాబాద్‌లో చికెన్, గుడ్ల ధరలు అకస్మాత్తుగా పెరిగాయి. గత రెండు నెలలుగా తగ్గుముఖం పట్టిన ధరలు ఇప్పుడు భారీగా పెరగడంతో వినియోగదారులు ఇబ్బందులు పడుతున్నారు.

కిలో చికెన్ ధర రూ.280-300 నుంచి రూ.60 పెరిగి రూ.340-360కు చేరింది. ఒక గుడ్డు ధర రూ.6 నుంచి రూ.2 పెరిగి రూ.8కు చేరింది. పౌల్ట్రీ వ్యాపారులు ఈ వివరాలు తెలిపారు.

వేసవి తీవ్రత కారణంగా కోళ్లు ఆహారం తీసుకోక నీరసించి చనిపోతుండటంతో గుడ్ల ఉత్పత్తి బాగా తగ్గింది. అదే సమయంలో తెలంగాణలో ఉత్పత్తి అయ్యే గుడ్లలో సగం మహారాష్ట్ర, ఉత్తరప్రదేశ్, పశ్చిమ బెంగాల్ వంటి రాష్ట్రాలకు ఎగుమతి అవుతున్నాయి. దీంతో స్థానికంగా కొరత ఏర్పడి ధరలు మరింత పెరిగాయి.

కోళ్లకు పెట్టే దాణా (సోయాబీన్, జొన్నలు, మొక్కజొన్న) ధరలు, రవాణా ఖర్చులు, డీజిల్, పెట్రోల్, మందుల ధరలు పెరగడంతో ఉత్పత్తి వ్యయం భారీగా పెరిగిందని వ్యాపారులు చెబుతున్నారు.

ధరలు ఎక్కువ కావడంతో కస్టమర్లు కొనుగోలు తగ్గించారు. కొందరు కిలోకు బదులు అర కిలో మాత్రమే కొంటున్నారు. ధర సాధారణ స్థాయికి వస్తేనే వ్యాపారం బాగా జరుగుతుందని వ్యాపారులు అంటున్నారు.

వర్షాలు పడి వాతావరణం చల్లబడితే ఉత్పత్తి పెరిగి చికెన్, గుడ్ల ధరలు తగ్గే అవకాశం ఉందని పౌల్ట్రీ రంగ నిపుణులు భావిస్తున్నారు.