చికెన్ మంచూరియా: చైనా నుంచి కాదు, ముంబై నుంచి వచ్చిన వంటకం

చికెన్ మంచూరియా వంటకం చైనాకు చెందినది కాదు. ఇది ముంబైలో పుట్టింది. 1970ల దశకంలో క్రికెట్ క్లబ్ ఆఫ్ ఇండియాలో పనిచేస్తున్న షెఫ్ నెల్సన్ వాంగ్ ఈ వంటకాన్ని రూపొందించారు.

కోల్కతాలో పుట్టి ముంబైలో స్థిరపడిన నెల్సన్ వాంగ్ మూడో తరం చైనీస్ ఇండియన్. ఒకరోజు కస్టమర్ కొత్త రుచి కోసం అడగడంతో ఆయన ప్రయోగాత్మకంగా కోడి మాంసం ముక్కలను డీప్ ఫ్రై చేసి, సోయా సాస్, అల్లం, వెల్లుల్లి, పచ్చిమిర్చి, కార్న్ స్టార్చ్ తో ఘాటైన సాస్ తయారు చేసి వడ్డించారు. కస్టమర్ చాలా ఇష్టపడ్డారు. అలా అనుకోకుండా చికెన్ మంచూరియా పుట్టింది.

కొద్దికాలంలోనే ఈ వంటకం క్లబ్ నుంచి దేశవ్యాప్తంగా వ్యాపించింది. నెల్సన్ వాంగ్ తర్వాత ముంబైలో 'చైనా గార్డెన్' రెస్టారెంట్ ప్రారంభించి మంచూరియాను మరింత ప్రాచూర్యంలోకి తెచ్చారు. గోబీ మంచూరియా, పన్నీర్ మంచూరియా, బేబీ కార్న్ మంచూరియాలాంటి రకాలు కూడా తయారయ్యాయి.

ఆహార నిపుణుల ప్రకారం, చైనీస్ వంట పద్ధతులను భారతీయ రుచులకు అనుగుణంగా మార్చే ఇండో-చైనీస్ వంటకాలకు మంచూరియా ఒక చక్కటి ఉదాహరణ. పేరు విదేశీదైనా, దాని రుచి పూర్తిగా భారతీయమైనది.