రాప్తాడు విద్యార్థిపై దాడి కేసు: పోలీసు కాల్పుల్లో నిందితుడు హేమంత్‌కు గాయాలు

అనంతపురం జిల్లా రాప్తాడులో 10వ తరగతి విద్యార్థిపై దాడి కేసులో నిందితుడు హేమంత్ పోలీసు కాల్పుల్లో తీవ్రంగా గాయపడ్డారు. ఆయనను అనంతపురం ప్రభుత్వ ఆసుపత్రికి తరలించి చికిత్స అందిస్తున్నారు.

ఆత్మకూరు అటవీ ప్రాంతంలో హేమంత్‌ను పట్టుకునేందుకు పోలీసులు ప్రయత్నించారు. ఆ సమయంలో ఆయన కత్తితో దాడి చేయడానికి ప్రయత్నించారు. ఈ ఘటనలో రాప్తాడు సీఐకి గాయాలయ్యాయి.

దీంతో తప్పనిసరి పరిస్థితుల్లోనే నిందితుడిపై ఆరు రౌండ్ల కాల్పులు జరపాల్సి వచ్చిందని అనంతపురం జిల్లా ఎస్పీ జగదీష్ తెలిపారు. ఈ ఘటనపై ఆయన వివరాలు వెల్లడించారు.

నిందితుడి కోసం 25 బృందాలను ఏర్పాటు చేసి గాలింపు చేపట్టినట్లు పోలీసులు తెలిపారు. సాయంత్రం దాదాపు 6:30 గంటలకు ఆత్మకూరు అటవీ ప్రాంతంలో ఉన్నట్లు సమాచారం అందింది. ఆ మేరకు బృందాలు అక్కడికి వెళ్లాయి. మొదట పోలీసులు గాలిలో కొన్ని రౌండ్లు కాల్పులు జరిపారు. అయినా ఆయన ఆగకుండా ఇన్‌స్పెక్టర్‌పై దాడి చేశారు. తర్వాత ఆయనపై కాల్పులు జరిపి అదుపులోకి తీసుకున్నారు.

ఇన్‌స్పెక్టర్ ఆరోగ్యం బాగానే ఉందని, గాయాలకు చికిత్స అందిస్తున్నట్లు ఎస్పీ జగదీష్ తెలిపారు. నిందితుడి పరిస్థితి కొంచెం క్రిటికల్‌గా ఉందని, ఆసుపత్రిలో చికిత్స కొనసాగుతోందని ఆయన చెప్పారు.