ఇరుముడి నిర్మాతలకు తెలంగాణ కార్మిక శాఖ నోటీసులు; నవంబర్ 4న విచారణ

బాల నటిని షూటింగ్‌లో, ప్రమోషనల్ ఈవెంట్స్‌లో ఎక్కువగా ఉపయోగించుకున్న వ్యవహారంపై ఇరుముడి చిత్ర నిర్మాతలకు తెలంగాణ కార్మిక శాఖ నోటీసులు జారీ చేసింది. నవంబర్ 4వ తేదీ ఉదయం 11 గంటలకు వ్యక్తిగతంగా విచారణకు హాజరుకావాలని అధికారులు ఆదేశించారు.

ఈ చిత్రం షూటింగ్‌లో, ప్రమోషనల్ కార్యక్రమాల్లో ఒక మైనర్ బాలికను ఎక్కువగా ఉపయోగించుకున్నారని అధికారులు పేర్కొన్నారు. బాల కార్మిక చట్టాల ఉల్లంఘన అనుమానంతో ఈ నోటీసు ఇచ్చినట్టు తెలిపారు. ఆ బాలికతో షూటింగ్ చేపట్టే ముందు జిల్లా మెజిస్ట్రేట్ నుంచి అధికారిక అనుమతి తీసుకున్నారా అని నోటీసులో ప్రశ్నించారు.

బాలికకు చెల్లించిన రెమ్యునరేషన్‌లో 20 శాతం మొత్తాన్ని ఆమె పేరు మీద ఫిక్స్‌డ్ డిపాజిట్ చేశారా అన్న వివరాలు వెంటనే సమర్పించాలని కూడా ఆదేశించారు. సెట్స్‌లో ఆమె పని వేళలు ఎలా ఉన్నాయి, చదువుకు ఆటంకం కలగకుండా మేకర్స్ ఏ చర్యలు తీసుకున్నారు అనే అంశాలపైనా ఆరా తీశారు. తల్లిదండ్రుల నుంచి లిఖితపూర్వక అనుమతి ఉందా అని కూడా విచారించారు.

నిర్దేశిత తేదీన సరైన ఆధారాలతో వివరణ ఇవ్వాలని నోటీసులో స్పష్టం చేశారు. విచారణలో నిబంధనల ఉల్లంఘన తేలితే నిర్మాతలపై చట్టపరమైన చర్యలు తీసుకోవాల్సి ఉంటుందని అధికారులు తెలిపారు.