చిలకలూరుపేటలో ప్రియురాలిని హత్య చేసిన యువకుడు అరెస్ట్

పల్నాడు జిల్లా చిలకలూరుపేటలో ప్రేమ వ్యవహారంలో ఓ యువకుడు తన ప్రియురాలిని హత్య చేసిన ఘటన వెలుగులోకి వచ్చింది. పోలీసులు తెలిపిన వివరాల ప్రకారం, నిందితుడు బాల సైదులు, మృతురాలు హసీనా గత నాలుగేళ్లుగా ప్రేమించుకున్నారు.

ఇటీవల హసీనా తనతో మాట్లాడటం తగ్గించడంతో బాల సైదులు ఆమెపై అనుమానం పెంచుకున్నాడు. ‘నాకు దక్కనిది మరెవరికీ దక్కకూడదు’ అనే ఉద్దేశంతో హత్య చేయాలని నిర్ణయించుకున్నట్లు పోలీసులు వెల్లడించారు. ఈ నెల 4న ఫోన్ చేసి కారంపూడికి రప్పించిన తర్వాత, నిర్మానుష్య ప్రాంతానికి తీసుకెళ్లి వెంట తెచ్చిన కూరగాయల కత్తితో పొడిచి చంపేశాడు.

ఆధారాలు లేకుండా చేయడానికి శవంపై బైక్‌లోని పెట్రోల్ పోసి నిప్పంటించాడు. ఘటనపై విచారణ చేపట్టిన పోలీసులు నిందితుడిని అదుపులోకి తీసుకున్నారు. విచారణలో నిందితుడు నేరాన్ని అంగీకరించినట్లు అధికారులు తెలిపారు.

ఈరోజు నిందితుడిని కోర్టులో హాజరుపరిచి, మూడు రోజుల పోలీస్ కస్టడీకి పిటిషన్ దాఖలు చేస్తామని పోలీసులు చెప్పారు. కత్తి, పెట్రోల్ ఎక్కడ కొన్నాడు, ఈ హత్యలో ఇతరుల ప్రమేయం ఉందా అనే విషయాలపై దర్యాప్తు కొనసాగుతోంది.