చైనాలో ప్రపంచ తొలి AI నేటివ్ క్రెడిట్ కార్డు ‘కిమి’ లాంచ్ – రివార్డ్స్‌గా AI టోకెన్లు

చైనా ప్రభుత్వ రంగ బ్యాంకు అగ్రికల్చర్ బ్యాంక్ ఆఫ్ చైనా, AI స్టార్టప్ మూన్‌షాట్ AIతో భాగస్వామ్యం వేసి ప్రపంచంలోనే తొలి AI-నేటివ్ క్రెడిట్ కార్డ్ ‘కిమి’ని లాంచ్ చేసింది. కిమి అనేది చైనాలో ప్రముఖ AI మోడల్, ఈ కార్డు ద్వారా బ్యాంకింగ్ అనుభవాన్ని పూర్తిగా AI ఆధారితంగా మార్చేందుకు ప్రయత్నిస్తోంది.

ఈ కార్డు వినియోగదారులు సుదీర్ఘ లావాదేవీల జాబితాను చూస్తూ కూర్చోనవసరం లేదు. వారు కిమికి సహజ భాషలో ప్రశ్నలు అడగవచ్చు. ఉదాహరణకు, ‘ఈ నెల నేను ఫుడ్‌కు ఎంత ఖర్చు చేశాను?’ లేదా ‘వడ్డీని తగ్గించే రీపేమెంట్ ప్లాన్ రూపొందించు’ అని అడిగితే, AI తక్షణమే వినియోగదారుని ఆర్థిక చరిత్రను విశ్లేషించి, వ్యక్తిగత సమాధానాలను ఇస్తుంది. సంవత్సరాల నాటి లావాదేవీల డేటాను కూడా రియల్ టైమ్‌లో ప్రాసెస్ చేయగలదు, కొనుగోళ్ల సమయంలోనే విశ్లేషణలు అందించగలదు.

అయితే ఈ కార్డు రివార్డ్స్ ప్రోగ్రామ్ భిన్నమైనది. సంప్రదాయ క్రెడిట్ కార్డులు క్యాష్ బ్యాక్ లేదా ఎయిర్‌లైన్ మైల్స్ ఇస్తే, కిమి కార్డు వినియోగదారులకు కిమి AI టోకెన్లు, కంప్యూటింగ్ క్రెడిట్స్ ఇస్తుంది. వీటిని ప్రీమియం AI ఫీచర్లు, అడ్వాన్స్డ్ టూల్స్, కిమి మెంబర్‌షిప్ బెనిఫిట్ల కోసం ఉపయోగించుకోవచ్చు. కార్డు టైర్ ను బట్టి AI మెంబర్‌షిప్లు, ప్రాంప్ట్ ఇంజనీరింగ్ కోర్సులు, ప్రత్యేక AI సామాజిక కార్యక్రమాల ఆహ్వానాలు కూడా లభిస్తాయి. కొత్త వినియోగదారులు మూడు నెలల ‘కిమి ఆండంటే’ మెంబర్‌షిప్ను, తొలి మ్యాక్స్ కార్డు హోల్డర్లు రెండు నెలల ‘కిమి అల్లెగ్రెట్టో’ మెంబర్‌షిప్ను పొందుతారు.

ఈ లాంచ్ చైనా ‘AI ప్లస్’ వ్యూహంలో భాగమే. డిజిటల్ చెల్లింపుల సంస్థల నుంచి పోటీ ఎదుర్కొంటున్న బ్యాంకులు, AIని క్రెడిట్ కార్డుల్లో ఇమిడ్చి మరింత స్మార్ట్, వ్యక్తిగతమైన అనుభవాన్ని అందించాలని చూస్తున్నాయి. ఈ కార్డు వర్గాల వారీగా ఖర్చు పరిమితులను సెట్ చేసుకోవడం, పరిమితి దాటితే కొనుగోళ్లను స్వయంచాలకంగా నిలిపివేయడం, అనుమానాస్పద కార్యకలాపాలను ముందే గుర్తించడం వంటి అడ్వాన్స్డ్ ఫీచర్లను కూడా అందిస్తుంది.

కాకపోతే, ఈ సాంకేతికత గోప్యతకు సంబంధించిన ప్రశ్నలను లేవనెత్తుతోంది. వ్యక్తిగత ఆర్థిక సలహా ఇవ్వడానికి AIకి వినియోగదారుని మొత్తం లావాదేవీల చరిత్ర అందుబాటులో ఉండాలి. దీంతో, వ్యక్తి ఖర్చు అలవాట్ల గురించి వివరణాత్మక చిత్రాన్ని ఏర్పరచుకునే అవకాశం ఉంటుంది. ఈ డేటాను ఎలా వాడతారు, భద్రత ఎలా కల్పిస్తారనేది సందేహమే. నిపుణులు హెచ్చరిస్తూ, భవిష్యత్తులో AI కేవలం క్రెడిట్ స్కోర్లపైనే కాకుండా, వినియోగదారులు AI అసిస్టెంట్‌తో ఎలా ఇంటరాక్ట్ అవుతారనే డేటా ఆధారంగా రుణాలకు అర్హత నిర్ణయించవచ్చని చెబుతున్నారు. ఇది కొత్త వినియోగదారులకు మేలు చేసినా, అల్గోరిథమిక్ బయాస్‌తో అన్యాయమైన నిర్ణయాలకు దారితీసే ప్రమాదం ఉంది.