సూర్యాపేట ఎల్కారంలో BRS నేత మధు హత్య: 5 ప్రత్యేక బృందాలు

సూర్యాపేట మండలం ఎల్కారం గ్రామంలో BRS మాజీ సర్పంచ్ భర్త చింతలపాటి మధు హత్యకు గురయ్యారు. నిన్న ఉదయం బయటికి వెళ్ళిన మధు రాత్రి వరకు తిరిగి రాలేదు. అర్ధరాత్రి తర్వాత గ్రామ సివార్లోని ఒక కాలువలో ఆయన మృతదేహాన్ని పోలీసులు గుర్తించారు.

తాళ్లగడ్డలోని ఒక ఇంట్లో మద్యం సిట్టింగ్ పేరిట మధును పిలిపించి హత్య చేసి శవాన్ని కాలువలో వేశారని క్లూస్ టీం ప్రాథమికంగా గుర్తించింది. 25 ఏళ్ల క్రితం మిద్దె రవీందర్ హత్య కేసులో మధు నిందితుడిగా ఉన్నారు. ఆ హత్యకు ప్రతీకారంగా ఇప్పుడు మధును చంపారా అనే కోణంలో పోలీసులు దర్యాప్తు చేస్తున్నారు.

ఎల్కారం గ్రామానికి దాదాపు 40 ఏళ్ల ఫ్యాక్షన్ చరిత్ర ఉంది. 1985లో TDP నేత ఎలగందుల సిద్దయ్య హత్యతో మొదలైన ఈ వివాదాల్లో ఇప్పటివరకు 8 మంది మరణించారు. పల్లె ఈదయ్య, అజయ్, చిన్న రమేష్, మిద్దె రవీందర్, ఒంటెద్దు వెంకన్న, వడ్డే ఎల్లయ్య ఇందులో ఉన్నారు.

వరుస హత్యలతో పలు కుటుంబాలు గ్రామాన్ని వదిలి వలస వెళ్ళాయని పోలీసులు తెలిపారు. మధు హత్య కేసు దర్యాప్తు కోసం 5 ప్రత్యేక బృందాలు ఏర్పాటు చేశారు. నిందితులను technical evidence ఆధారంగా కనెక్ట్ చేసి కోర్టులో శిక్ష పడేలా చేస్తామని పోలీసులు తెలిపారు. గ్రామంలో భారీ బందోబస్తు ఏర్పాటు చేశారు.