అవార్డుల కన్నా ప్రజల ప్రేమే గొప్పదన్న చిరంజీవి

నటుడు చిరంజీవి తన కుమారుడు రామ్ చరణ్ నటనపై ఆసక్తికర వ్యాఖ్యలు చేశారు. ప్రస్తుత చిత్రం 'Game Changer' లో చరణ్ నటన నేషనల్ అవార్డ్ స్థాయిలో ఉందని ప్రేక్షకులు, విమర్శకులు అంటున్నారని తెలిపారు. అయితే అవార్డు రావడం, రాకపోవడం పెద్ద విషయం కాదని, ప్రజల మనసుల్లో స్థానం సంపాదించడమే అసలైన గుర్తింపు అని స్పష్టం చేశారు.

గతంలో 'రంగస్థలం' సినిమాకు కూడా అవార్డు రావాలని దర్శకుడు సుకుమార్ తనతో ఎన్నోసార్లు అన్నారని చిరంజీవి గుర్తు చేశారు. స్టార్ హీరో కొడుకు అనే ముద్రతో సంబంధం లేకుండా చరణ్ తన నటనకు మెరుగులు దిద్దుకున్నారని, దర్శకుడు చెప్పినది యాంత్రికంగా చేయకుండా అంతకంటే ఎక్కువగా రాణించారని ప్రశంసించారు.

అవార్డు రావడానికి ఎన్నో దారులు ఉంటాయని, అది లభించినా లభించకపోయినా పెద్ద తేడా ఉండదని చిరంజీవి అభిప్రాయపడ్డారు. ప్రజలు ఇచ్చే ప్రశంసలే అత్యున్నత పురస్కారమని తాను గాఢంగా నమ్ముతున్నట్లు తెలిపారు.