తిరుమలలో దీపావళి ఆస్థానం: మలయప్ప స్వామికి ప్రత్యేక అలంకరణ, హారతులు

తిరుమల శ్రీవారి ఆలయంలో దీపావళి ఆస్థానం నిర్వహించారు. ఉదయం ప్రాతఃకాల ఆరాధనలు పూర్తయిన తర్వాత ఈ కార్యక్రమం ప్రారంభమైంది. బంగారు వాకిలిలో ఉభయదేవేరులతో శ్రీ మలయప్ప స్వామి సర్వభూపాల వాహనంపై వేంచేశారు.

స్వామివారికి విశేష వజ్రాభరణాలతో అలంకరణ చేశారు. పుష్పాలంకరణ కూడా పూర్తి చేశారు. మధ్యాహ్న ఆరాధనలో భాగంగా తులసీ దళాలతో అష్టోత్తర శతనామార్చన జరిగింది.

దీపావళి సందర్భంగా ప్రత్యేక పడులు ప్రసాదాలను మేళతాళాలతో ధ్వజస్తంభం ప్రదక్షిణ చేసి ఆలయంలోకి తీసుకొచ్చారు. గంటా నాదాల మధ్య వాటిని స్వామివారికి నైవేద్యంగా సమర్పించారు. నరసింహ స్వామి ఆలయం నుంచి నూతన పట్టు వస్త్రాలను ఊరేగింపుగా ఆలయానికి తీసుకొచ్చారు. గర్భాలయంలో మూలమూర్తికి నూతన వస్త్రాలు సమర్పించారు. బంగారు వాకిలిలో ఉన్న మలయప్ప స్వామి, ఉభయదేవేరులు, సేనాధిపతికి కూడా నూతన వస్త్రాలు సమర్పించారు.

రూపాయి హారతి, ప్రత్యేక హారతుల నడుమ కార్యక్రమాలు జరిగాయి. అనంతరం స్థాన బహుమానంతో ఆస్థానం ముగిసింది. దీపావళి పర్వదినం సందర్భంగా శ్రీవారి ఆలయంలో అన్ని ఆర్జిత సేవలు రద్దు చేశారు.