వినాయక చవితికి పర్యావరణ హితమైన విత్తన గణేశుడిని పూజించాలని చిరంజీవి విజ్ఞప్తి

వినాయక చవితి సందర్భంగా నటుడు చిరంజీవి పర్యావరణ హితమైన విగ్రహాలను పూజించాలని విజ్ఞప్తి చేశారు. ప్లాస్టర్ ఆఫ్ పారిస్ విగ్రహాలు, కెమికల్ కలర్స్ నీరు, వాతావరణం కలుషితం చేస్తాయని ఆయన అన్నారు. వీటి వల్ల ఆరోగ్యానికి కూడా హాని జరుగుతుందని హెచ్చరించారు.

మట్టి ప్రతిమ లోపల విత్తనాలు వేసి పూజించాలని చిరంజీవి సూచించారు. నిమజ్జనం రోజున విగ్రహాన్ని బయట పడేయకుండా ఇంట్లో నీటి తొట్టిలో నిమజ్జనం చేయాలని చెప్పారు. ప్రతిమ కరిగిన తర్వాత ఆ నీటిని మట్టిలో పోస్తే మొక్కగా పెరుగుతుందని తెలిపారు. దీనివల్ల పర్యావరణానికి మేలు జరుగుతుందని అన్నారు.

ఈ ఐడియాను మాజీ ఎంపీ సంతోష్ కుమార్ ప్రోత్సహిస్తున్నారని చిరంజీవి పేర్కొన్నారు. సంతోష్ కుమార్ కృషితో ఇప్పటివరకు దాదాపు 20 కోట్ల మొక్కలు నాటినట్టు తెలిపారు. తెలుగు ప్రజలకు వినాయక చవితి శుభాకాంక్షలు తెలిపారు.