తీగజాతి కూరగాయల పందిరి సాగు — విశాఖ ఏజెన్సీ రైతులకు శాస్త్రవేత్త సూచనలు

విశాఖ జిల్లా చింతపల్లి ఉద్యాన పరిశోధన స్థానం శాస్త్రవేత్త డాక్టర్ శివకుమార్ తీగజాతి కూరగాయల సాగుపై మార్గదర్శకాలు వివరించారు. పొట్ల, కాకర, సొర, బీర, దొండ వంటి తీగజాతి కూరగాయలను ఖరీఫ్‌లో జూన్–జూలైలో విత్తుకోవచ్చని ఆయన తెలిపారు. నీటి వసతి ఉన్న ప్రాంతాల్లో జనవరి–ఫిబ్రవరిలో కూడా సాగు చేయవచ్చు.

విత్తన శుద్ధి తప్పనిసరి అని డాక్టర్ శివకుమార్ స్పష్టం చేశారు. సేంద్రియ పద్ధతిలో సాగు చేసే రైతులు ఒక కేజీ విత్తనానికి 20 గ్రాముల ట్రైకోడర్మా విరిడీతో విత్తన శుద్ధి చేయాలి. రసాయనిక పద్ధతిలో అయితే మూడు గ్రాముల థైరం మరియు అయిదు గ్రాముల ఇమిడాక్లోప్రిడ్ వాడాలి. ఇది భూమి ద్వారా వచ్చే తెగుళ్ళను, తొలి దశలో వచ్చే రసం పీల్చే పురుగులను నివారిస్తుంది.

మొక్కకు రెండు నుండి నాలుగు ఆకులు వచ్చిన దశలో లీటర్ నీటికి మూడు గ్రాముల బోరాక్స్ కలిపి పిచికారి చేయాలి. దీని వల్ల ఆడపూలు ఎక్కువగా వచ్చి దిగుబడి పెరుగుతుందని శాస్త్రవేత్త వివరించారు.

పూత దశ వరకు 5% వేపగింజల కషాయం లేదా 1500 PPM గాఢత ఉన్న వేప నూనెను లీటర్ నీటికి 5 మిల్లీలీటర్ల చొప్పున పిచికారి చేయాలి. రసం పీల్చే పురుగులు వైరస్ తెగులు కూడా వ్యాప్తి చేస్తాయి కనుక ముందే నివారించడం అవసరం.

ఏజెన్సీ ప్రాంతంలో తీగజాతి కూరగాయలను నేల మీదే పెంచే పద్ధతి వల్ల కాయలు కుళ్ళిపోవడం, పండు ఈగ సమస్యలు వస్తున్నాయని శాస్త్రవేత్త తెలిపారు. వెదురుకర్ర పందిళ్ళపై సాగు చేస్తే కాయ నాణ్యత మెరుగవుతుంది. మార్కెట్‌లో మంచి ధర వస్తుందని ఆయన అన్నారు.

ప్రతి 20–30 రోజులకు ఒకసారి ట్రైకోడర్మా విరిడీని నేలలో కలపాలి. పండు ఈగ నివారణకు మిథైల్ యూజినాల్ ఎరలు వాడవచ్చు. వేసవిలో లోతు దుక్కులు చేయడం, పంట మార్పిడి పాటించడం, కలుపు నివారణ చేయడం ద్వారా తెగుళ్ళను చాలావరకు అరికట్టవచ్చని డాక్టర్ శివకుమార్ సూచించారు.