విశ్రాంత IPS బాలసుబ్రహ్మణ్యం మృతదేహానికి సీఎం చంద్రబాబు నివాళులు

విశ్రాంత IPS అధికారి బాలసుబ్రహ్మణ్యం మృతదేహానికి సీఎం చంద్రబాబు నివాళులు అర్పించారు. విజయవాడ ఎంజీ రోడ్డులోని పోలీస్ ఆర్మ్డ్ రిజర్వ్ గ్రౌండ్స్ వద్ద ఆయన పార్థివ దేహాన్ని ఉంచారు. ఈ సందర్భంగా సీఎం పుష్పగుచ్ఛం పెట్టి నివాళులు అర్పించారు.

అమెరికాలో చికిత్స పొందుతూ బాలసుబ్రహ్మణ్యం అకస్మికంగా మృతి చెందారు. ఆయన మృతదేహాన్ని విజయవాడకు తరలించి, ప్రజల సందర్శనార్థం ఉంచారు. నివాళులు అర్పించిన తర్వాత సీఎం చంద్రబాబు ఆయన కుటుంబ సభ్యులను పరామర్శించారు.

ఉమ్మడి ఆంధ్రప్రదేశ్‌లో బాలసుబ్రహ్మణ్యం పలు కీలక బాధ్యతలు నిర్వహించారు. ఎక్కువగా సమస్యాత్మక గ్రామాల్లో ఆయన పని చేశారు. గ్రే హౌండ్స్, ఇంటెలిజెన్స్ వంటి విభాగాల్లోనూ బాధ్యతలు చేపట్టారు. టెక్నాలజీ పట్ల ఆయనకు ప్రత్యేక ఆసక్తి ఉంది.

రవాణా శాఖ కమిషనర్‌గా ఉన్నప్పుడు వాహన రిజిస్ట్రేషన్ ప్రక్రియను ఆయన సులభతరం చేశారు. రాష్ట్రంలో ప్రగతి వంటి కీలక వ్యవస్థల ఏర్పాటులో ప్రధాన బాధ్యతలు నిర్వహించారు. ఆ బాధ్యతలను బాలసుబ్రహ్మణ్యం గారికి అప్పగించినట్టు సీఎం చంద్రబాబు తెలిపారు. ఆ శాఖలో ఆయన చేసిన కృషిని చంద్రబాబు గుర్తు చేసుకున్నారు.