రాప్తాడు పాఠశాల ఘటన: లక్ష్మి ధైర్యాన్ని ప్రశంసించిన మంత్రి నారా లోకేష్

అనంతపురం జిల్లా రాప్తాడు పాఠశాలలో ఓ బాలికపై రంపంతో జరిగిన దాడి ఘటనపై విద్యాశాఖ మంత్రి నారా లోకేష్ స్పందించారు. దాడిలో తీవ్రంగా గాయపడిన బాలిక త్వరగా కోలుకోవాలని ఆయన ఆకాంక్షించారు.

దాడి సమయంలో భయపడి పారిపోకుండా లక్ష్మి తన స్నేహితురాలిని కాపాడేందుకు అడ్డుగా నిలబడింది. ప్రాణాలను లెక్క చేయకుండా స్నేహితురాలి కోసం పోరాడిన లక్ష్మి ధైర్యాన్ని మంత్రి ప్రశంసించారు. లక్ష్మి నిజమైన స్నేహానికి, ధైర్యానికి నిదర్శనమని లోకేష్ అన్నారు.

ప్రస్తుతం ఇద్దరు బాలికలు ఆస్పత్రిలో చికిత్స పొందుతున్నారు. వారి కుటుంబాలకు ప్రభుత్వం అన్ని విధాలుగా అండగా ఉంటుందని మంత్రి హామీ ఇచ్చారు. ఇద్దరికీ అత్యుత్తమ వైద్యం అందిస్తామని లోకేష్ స్పష్టం చేశారు.

పాఠశాలల్లో భద్రతను మరింత పెంచుతామని మంత్రి తెలిపారు. ఇద్దరు బాలికలు త్వరగా కోలుకుని మళ్లీ చిరునవ్వులతో పాఠశాలకు రావాలని ఆయన ఆకాంక్షించారు.