అనంతపురం రాప్తాడు పాఠశాలలో విద్యార్థినిపై రంపంతో దాడి; కాపాడబోయిన స్నేహితురాలికి గాయాలు

అనంతపురం జిల్లాలోని రాప్తాడు జిల్లా పరిషత్ ప్రభుత్వ పాఠశాలలో ఒక విద్యార్థినిపై ఒక వ్యక్తి ఎలక్ట్రిక్ రంపంతో దాడి చేశాడు. ఆమెను కాపాడబోయిన తోటి విద్యార్థినికి కూడా తీవ్ర గాయాలయ్యాయి.

నిందితుడు హేమంత్ బైక్‌పై పాఠశాలకు వచ్చాడు. బయటే రంపాన్ని ఆన్ చేసుకుని, తరగతి గది తలుపును కత్తిరించి లోపలికి వెళ్లాడు.

తరగతి గదిలో ఒక విద్యార్థినిపై అతను దాడి చేస్తుండగా, పక్కనే ఉన్న స్నేహితురాలు ఆమెను లాగి కాపాడే ప్రయత్నం చేసింది. దీంతో అతను ఆమెపై కూడా దాడి చేశాడు. ఆ విద్యార్థిని మెడ, ముఖం, కాళ్లపై గాయాలయ్యాయి.

దాడి సమయంలో తోటి విద్యార్థులు, ఉపాధ్యాయులు భయపడి బయటకు వెళ్లిపోయారని గాయపడిన విద్యార్థిని తెలిపింది. అనంతరం నిందితుడు రంపాన్ని వదిలి వెళ్లిపోయాడు.

గాయపడిన విద్యార్థినులను తొలుత ప్రభుత్వ ఆస్పత్రికి, తర్వాత పెద్ద ఆస్పత్రికి తరలించారు. కాపాడబోయిన విద్యార్థినికి రెండు కాళ్లకూ ఆపరేషన్ జరిగింది. ప్రస్తుతం ఆమె చికిత్స తీసుకుంటోంది.

నిందితుడు హేమంత్‌పై పోలీసులు కాల్పులు జరిపారు. గాయపడిన అతను అదే ఆస్పత్రిలోని పక్క వార్డులో చికిత్స పొందుతున్నాడు.

తన స్నేహితురాలిని కాపాడబోయి గాయపడిన విద్యార్థిని, నిందితుడికి కఠిన శిక్ష పడాలని కోరుతోంది. తాను కోలుకున్న తర్వాత మళ్లీ ధైర్యంగా పాఠశాలకు వెళ్తానని ఆమె చెప్పింది.