పట్టణీకరణ, పశుగ్రాసం కొరతతో పాడి పరిశ్రమ క్షీణత; పాల ఉత్పత్తి తగ్గుతోంది

ఆంధ్రప్రదేశ్‌లో పాడి రైతుల సంఖ్య రోజురోజుకు తగ్గుతోంది. పట్టణీకరణ పెరగడం, పశుగ్రాసం కొరత ఇందుకు ప్రధాన కారణాలుగా చెబుతున్నారు.

గతంలో ప్రతి పల్లెలో పెద్ద సంఖ్యలో కుటుంబాలు పాడి పరిశ్రమపై ఆధారపడి ఉండేవి. పల్లెల నుంచి ప్రతిరోజూ వేల లీటర్ల పాలు పట్టణాలకు క్యాన్లలో వెళ్లేవి.

ఇప్పుడు పరిస్థితి మారింది. పశుగ్రాసం ఉండే భూములు అపార్ట్‌మెంట్లు, ఫ్లాట్లుగా మారిపోయాయి. పచ్చగడ్డి దొరకకపోవడంతో పశువులకు ఎండు దాణాపైనే ఆధారపడాల్సి వస్తోంది. దాణా ధరలు కూడా భారీగా పెరిగాయి.

సరైన పోషకాహారం లేక పశువులు అనారోగ్యానికి గురవుతున్నాయని, పాల దిగుబడి తగ్గుతోందని పశు వైద్యులు చెబుతున్నారు. రాష్ట్రంలో రోజుకు కోట్ల లీటర్ల పాలు అవసరం ఉందని, కానీ అంత ఉత్పత్తి జరగడం లేదని నిపుణులు చెబుతున్నారు.

నగరాల్లో నివసించే వారు పాల ప్యాకెట్లు, కల్తీ పాలపై ఆధారపడుతున్నారు. కల్తీ పాలు తాగితే తీవ్ర ఆరోగ్య సమస్యలు వస్తాయని వైద్యులు హెచ్చరిస్తున్నారు. క్యాన్లలో పాలు తీసుకొచ్చే వారు ప్యాకెట్ పాలు కలిపి అమ్ముతున్నారని ఆరోపణలు ఉన్నాయి.

పాడి రైతులను ప్రోత్సహించే చర్యలు తీసుకోవాలని రైతులు ప్రభుత్వాన్ని కోరుతున్నారు.