260 PPP ప్రాజెక్టుల ప్రగతిపై సీఎం చంద్రబాబు సమీక్ష

ముఖ్యమంత్రి చంద్రబాబు నాయుడు రాష్ట్ర సచివాలయంలో పీపీపీ (పబ్లిక్ ప్రైవేట్ పార్ట్నర్షిప్) ప్రాజెక్టుల పురోగతిపై ఉన్నత స్థాయి సమీక్ష నిర్వహించారు.

పోర్టులు, షిప్యార్డ్లు, విమానాశ్రయాలు, పర్యాటకం, పరిశ్రమలు, మౌలిక సదుపాయాలు, వైద్య కళాశాలలు, రహదారులు, సౌర విద్యుత్ తదితర రంగాల్లో చేపట్టిన మొత్తం 260 ప్రాజెక్టుల వివరాలను అధికారులు సీఎంకు అందించారు. ఈ ప్రాజెక్టుల విలువ ₹1.23 లక్షల కోట్లకు పైగా ఉన్నట్లు తెలిపారు.

ఈ సమావేశంలో పీపీపీ ప్రాజెక్టులను దీర్ఘకాలిక ప్రయోజనాలిచ్చే సుస్థిర నమూనాల్లో అభివృద్ధి చేయాలని సీఎం అధికారులకు సూచించారు. ఆర్థిక శాఖ మంత్రి పయ్యావుల కేశవ్, పలు శాఖల ఉన్నతాధికారులు హాజరయ్యారు.

పోర్టులు, విమానాశ్రయాలు, పర్యాటకం వంటి రంగాలపై దృష్టి పెడితే రాష్ట్రానికి అదనపు ఆదాయం వచ్చే అవకాశం ఉందని సమీక్షలో చర్చించారు. ప్రస్తుతం రాష్ట్ర ఆర్థిక పరిస్థితిని మెరుగుపరిచేందుకు పెట్టుబడులు ఆకర్షించే ప్రయత్నాలు కొనసాగుతున్నాయి. ఈ క్రమంలో నెలవారీ వ్యయాలు, ఆదాయంపై కూడా సీఎం సమీక్షిస్తున్నారని సచివాలయ వర్గాలు తెలిపాయి.

ఈ 260 ప్రాజెక్టుల్లో ₹2,329 కోట్ల విలువైన ప్రత్యేక ప్రాజెక్టులకు సంబంధించి కూడా వివరాలు సీఎంకు నివేదించారు. వాటిని త్వరితగతిన పూర్తి చేయాలని సూచనలు చేసినట్లు సమాచారం.