విశాఖ ఎకనామిక్ రీజియన్ అభివృద్ధిపై సీఎం చంద్రబాబు సమీక్ష

ముఖ్యమంత్రి చంద్రబాబు నాయుడు బుధవారం విశాఖ ఎకనామిక్ రీజియన్ (విఈఆర్) అభివృద్ధి ప్రణాళికలపై సమీక్ష నిర్వహించారు. తూర్పు నుంచి పశ్చిమ భారతాన్ని అనుసంధానించేలా రోడ్డు, రైలు ప్రణాళికలు సిద్ధం చేయాలని అధికారులకు సూచించారు. నాలుగు విమానాశ్రయాలు, మూడు పోర్టులను పశ్చిమ భారతంలోని వివిధ ప్రాంతాలతో కలిపితే పెట్టుబడులు పెరుగుతాయని అన్నారు.

ఈ తూర్పు-పశ్చిమ అనుసంధానంపై జాతీయ స్థాయిలో చర్చ జరుగుతోందని, ప్రధాని మోదీ కూడా ఇటీవల ఈ అంశాన్ని ప్రస్తావించారని ఆయన గుర్తు చేశారు. విశాఖ బేస్ సిటీ ప్రాజెక్ట్ కోసం ప్రత్యేక ఎగ్జిక్యూటివ్ కమిటీ ఏర్పాటు చేయాలని, జీసీసీ, ఫిన్టెక్, లాజిస్టిక్స్, ఇంటిగ్రేషన్ రంగాలపై దృష్టి సారించాలని నిర్దేశించారు.

విశాఖలో జంతు ప్రదర్శనశాల అభివృద్ధి చేయాలని, ఇది పర్యాటక ప్రాజెక్ట్‌గా ఉపయోగపడుతుందని సీఎం పేర్కొన్నారు. శ్రీకాకుళం జిల్లా మూలపేట పోర్టు నుండి రాజమహేంద్రవరంలోని అఖండ గోదావరి ప్రాజెక్ట్ వరకు ప్రతి పర్యాటక స్థలం, ప్రతి రంగాన్ని అభివృద్ధి చేసి పెట్టుబడులను ఆకర్షించాలని సూచించారు. సూక్ష్మ స్థాయి ప్రణాళికలు రూపొందించాలన్నారు.

విఈఆర్ పరిధిలో 9.5 లక్షల కోట్ల వరకు పెట్టుబడుల అవకాశం ఉందని అధికారులు సమావేశంలో తెలిపారు. బేస్ సిటీని యాంకర్ ప్రాజెక్ట్‌గా అభివృద్ధి చేసేలా ప్రణాళికలు సిద్ధం చేస్తున్నట్లు చెప్పారు. ఆంధ్ర విశ్వవిద్యాలయం సహా విద్యా సంస్థలను భాగస్వాములుగా చేయాలని, సిఆర్జెడ్ నిబంధనలకు అనుగుణంగా ప్రాజెక్టులు చేపట్టాలని, పిపిపి ప్రాజెక్టులతో పాటు వయాబిలిటీ గ్యాప్ ఫండింగ్ (విజిఎఫ్) అవకాశాలను పరిశీలించాలని సీఎం చంద్రబాబు ఆదేశించారు.