పాలమూరు సాగునీటి ప్రాజెక్టుల పరిశీలనకు సీఎం రేవంత్ రెండు రోజుల పర్యటన

సీఎం రేవంత్ రెడ్డి నేడు రెండు రోజుల పాలమూరు పర్యటన మొదలుపెట్టారు. సాగునీటి ప్రాజెక్టుల పనులను పరిశీలించడానికి ఈ పర్యటన చేపట్టారు.

మొదటి రోజు నారాయణపేట జిల్లా మక్తల్ హెలిపాడ్‌కు చేరుకున్నారు. అధికారులు మక్తల్-నారాయణపేట-కొడంగల్ ఎత్తిపోతల పథకం పనులను వివరించారు. కృష్ణ, భీమా నదులపై ప్రతిపాదిత బ్యారేజీల పనులను ఆయన పరిశీలించారు. అనంతరం కోయిల్ సాగర్ ప్రాజెక్ట్, ప్రియదర్శిని జూరాల ప్రాజెక్ట్ డ్యామ్ ప్రాంతాన్ని ఏరియల్ వ్యూ ద్వారా పరిశీలించారు.

జోగులాంబ గద్వాల జిల్లా దారూరు మండలంలో గూడెం దొడ్డి హెలిపాడ్ చేరుకొని, స్థానిక ప్రజా ప్రతినిధులతో సమావేశమయ్యారు. గూడెం దొడ్డి రిజర్వాయర్, జెఎన్‌ఎల్‌ఐఎస్ స్టేజ్-1 పంప్ హౌస్‌ను పరిశీలించారు. సాయంత్రం సోమసిల చేరుకుని, మృగవాని రిసార్ట్‌లో ఉమ్మడి మహబూబ్‌నగర్ జిల్లాలోని అన్ని ప్రధాన సాగునీటి ప్రాజెక్టులపై ఉన్నత స్థాయి సమీక్షా సమావేశం నిర్వహించారు.

రెండో రోజు ఉదయం కొల్లాపూర్‌లో మంత్రి జూపల్లి నివాసంలో బ్రేక్‌ఫాస్ట్ తర్వాత, నాగర్‌కర్నూల్ జిల్లా ఎల్లూరు పంప్ హౌస్ చేరుకుంటారు. పాలమూరు-రంగారెడ్డి ఎత్తిపోతల పథకం (పీఆర్‌ఎల్‌ఐఎస్) పనులను పరిశీలిస్తారు. నార్లాపూర్ రిజర్వాయర్, ఎంజీకేఎల్‌ఐఎస్ లిఫ్ట్-1 పంప్ హౌస్ లను సందర్శించి, పీఆర్‌ఎల్‌ఐఎస్ ప్యాకేజీ 3 కాలువ, ఏదుల రిజర్వాయర్ పంప్ హౌస్ పనులను ఏరియల్ వ్యూతో పరిశీలిస్తారు. తర్వాత వట్టెం రిజర్వాయర్, కర్వేన రిజర్వాయర్, ఉదండాపూర్ రిజర్వాయర్ ప్యాకేజీల పనులను కూడా చూస్తారు. సాయంత్రం ఉదండాపూర్ వద్ద బహిరంగ సభలో పాల్గొంటారు.

పాలమూరు జిల్లాలో సాగునీటి ప్రాజెక్టుల పెండింగ్ పనులు, కొత్త ప్రాజెక్టులపై ముఖ్యమంత్రి దృష్టి పెట్టారు. ఇటీవల హైదరాబాద్‌లో కర్ణాటక ఇరిగేషన్ మంత్రి బోసరాజుతో సీఎం, తెలంగాణ ఇరిగేషన్ మంత్రి ఉత్తమ్ కుమార్ రెడ్డి చర్చించారు. కృష్ణ, భీమా నదులపై మూడు రోడ్ కమ్ బ్యారేజీల నిర్మాణానికి రెండు రాష్ట్రాలు సిద్ధంగా ఉన్నాయి.