యాదగిరిగుట్ట ఆలయంలో ₹100 కోట్ల అభివృద్ధి పనులకు శంకుస్థాపన

యాదగిరిగుట్ట లక్ష్మీ నరసింహ స్వామి ఆలయంలో ₹100 కోట్ల అభివృద్ధి పనులకు ఈ నెల 23న శంకుస్థాపన జరుగుతుందని ఆలయ EO భవాని శంకర్ తెలిపారు. CM రేవంత్ రెడ్డి, కంచి కామకోటి పీఠాధిపతి శంకర విజయేంద్ర సరస్వతి సంయుక్తంగా ఈ కార్యక్రమం నిర్వహిస్తారు.

ఈ కార్యక్రమంలో మొత్తం ఐదు నిర్మాణ పనులకు భూమిపూజ చేయనున్నారు. అవి: వేద పాఠశాల, కళ్యాణ మండపం, దీక్షాపరుల భవనం, వైకుంఠ ద్వారం నుండి పైకి మెట్లకు పైకప్పు, వాయువ్య దిశలో మాడ వీధులకు మెట్ల మార్గం.

ఈ నిధులు ఆలయ ఖజానా మరియు ప్రభుత్వ గ్రాంట్ల ద్వారా సమకూరుస్తారని EO తెలిపారు. టెండర్లు పూర్తయిన తర్వాత ఒకటి రెండు నెలల్లో నిర్మాణ పనులు ప్రారంభమవుతాయని చెప్పారు.

CM పర్యటనను దృష్టిలో పెట్టుకుని 23న ఆలయాన్ని సాధారణ సమయం కంటే ముందుగా తెరుస్తారని EO తెలిపారు. మూడున్నర గంటలకు తెరుచుకునే ఆలయం ఆ రోజు మూడు గంటలకే తెరుస్తారు. అభిషేకాలు ఐదున్నర బదులు ఐదు గంటలకే మొదలవుతాయి.

CM రేవంత్ రెడ్డి నాలుగు నాలుగున్నర ప్రాంతంలో నరసింహ స్వామి ఆలయాన్ని సందర్శించి ప్రత్యేక పూజలు నిర్వహిస్తారు. అనంతరం పర్వతవర్ధిని సమేత రామలింగేశ్వర స్వామి ఆలయానికి వెళ్తారు. ఆరు ఆరున్నర ప్రాంతంలో కళావేదిక దగ్గర 24 మంది వేద పండితులతో చతుర్వేద పారాయణం, స్వామివారి అనుగ్రహ భాషణం జరుగుతాయి.