కాంప్లెక్స్ ఎరువుల ధరలు పెరగడంతో తెలంగాణ రైతులకు భారం

కాంప్లెక్స్ ఎరువుల ధరలు పెరగడంతో తెలంగాణలో రైతులు ఆందోళన చెందుతున్నారు. ఒక్కో బస్తాపై ₹150 నుండి ₹300 వరకు ధరలు పెరిగాయి. వరి, పత్తి, మిర్చి, మొక్కజొన్న పంటలకు కాంప్లెక్స్ ఎరువులు అధికంగా అవసరమవుతాయి.

ఒక ఎకరం సాగు చేయాలంటే గతంతో పోలిస్తే ఇప్పుడు వేల రూపాయలు అదనంగా ఖర్చవుతోందని రైతులు తెలిపారు. విత్తనాలు, కూలీలు, డీజిల్ ఖర్చులు ఇప్పటికే అధికంగా ఉండగా, ఎరువుల ధరలు కూడా పెరగడంతో పెట్టుబడి భారం రెట్టింపు అవుతోందని వారు ఆవేదన వ్యక్తం చేశారు.

ఇరాన్–ఇజ్రాయిల్ యుద్ధం కారణంగా దేశవ్యాప్తంగా ఎరువుల ధరలు పెరిగాయని రైతు సంఘాల నాయకులు తెలిపారు. యుద్ధం సాకు చూపి డీలర్లు ధరలు పెంచారని వారు ఆరోపించారు. ప్రభుత్వం సబ్సిడీపై అందించే యూరియా ధరల్లో మాత్రం ఎలాంటి మార్పు లేదని వారు పేర్కొన్నారు.

యాసంగి సీజన్‌లో ఎరువుల ధరలు నియంత్రించేందుకు తెలంగాణ ప్రభుత్వం ఒక app తీసుకొచ్చినట్లు రైతు సంఘ నాయకులు తెలిపారు. అవసరమైన సమయంలో ఎరువులు అందకపోవడంతో అధిక ధరలకు కొనాల్సి వస్తోందని రైతులు చెప్పారు.

కాంప్లెక్స్ ఎరువుల ధరలు వెంటనే నియంత్రించాలని, రైతులకు తోడ్పాటు అందించాలని రైతు సంఘాల నాయకులు కేంద్ర ప్రభుత్వాన్ని డిమాండ్ చేస్తున్నారు. చర్యలు తీసుకోకపోతే పంటసాగుపై తీవ్ర ప్రభావం పడే అవకాశం ఉందని వారు హెచ్చరించారు.