ఖైరతాబాద్ RTO కార్యాలయంలో కాంక్రీట్ మిల్లర్లు, కార్మికుల తీవ్ర నిరసన

హైదరాబాద్‌లోని ఖైరతాబాద్ RTO కార్యాలయాన్ని ఇవాళ ఉదయం కాంక్రీట్ మిల్లర్లు, భవన నిర్మాణ కార్మికులు భారీ సంఖ్యలో ముట్టడించారు. వాహనాలపై భారీగా జరిమానాలు విధిస్తున్నారని, వేధింపులకు గురవుతున్నారని ఆరోపిస్తూ వారు ఆందోళన చేపట్టారు.

నిరసనలో పాల్గొన్నవారు మాట్లాడుతూ, RTO అధికారులు కాంక్రీట్ మిక్సర్ వాహనాలపై ఒక్కోదానికి ఒక్కోసారి ₹24,000 వరకు ఫైన్ వేస్తున్నారని, పోలీసులు కూడా డబ్బులు వసూలు చేస్తున్నారని ఆరోపించారు. వీటి వల్ల రోజువారీ ఆదాయం దెబ్బతింటోందని, కుటుంబాలు రోడ్డున పడే పరిస్థితి ఏర్పడిందని వారు వాపోయారు.

హైదరాబాద్‌లో దాదాపు 4,500 మంది కార్మికులు, వేలాది మిల్లర్ వాహనాలు ఇలా ప్రభావితమవుతున్నాయని, తమలో ఎక్కువ మంది ఉమ్మడి పాలమూరు జిల్లా నుంచి వలస వచ్చిన వారు అని నిరసనకారులు తెలిపారు. వారు ఫైన్లు రద్దు చేయాలని, మిక్సర్ వాహనాలను నిర్దిష్ట వేళల్లో మాత్రమే రోడ్లపై నడిపేందుకు అనుమతించాలని డిమాండ్ చేశారు.

నిరసన సందర్భంగా సంఘటన స్థలానికి చేరుకున్న రవాణా శాఖ కమిషనర్‌తో చర్చించేందుకు ప్రయత్నించగా, పోలీసులు వారిని నియంత్రించారు. ఆందోళనకారులు రాష్ట్రవ్యాప్తంగా పెద్ద ఎత్తున నిరసనలు చేపడతామని హెచ్చరించారు. ఈ విషయంపై RTO అధికారులు, పోలీసుల నుంచి ఎటువంటి స్పందన లభ్యం కాలేదు.