మీనాక్షి నటరాజన్ నామినేషన్ తిరస్కరణపై కాంగ్రెస్ తీవ్ర ఆగ్రహం; జూన్ నుంచి గ్రామస్థాయి నిరసనలు

ఢిల్లీలోని ఇందిరా భవన్లో ఆల్ ఇండియా కాంగ్రెస్ కమిటీ (AICC) అత్యవసర సమావేశం జరిగింది. పార్టీ అధ్యక్షుడు మల్లికార్జున్ ఖర్గే అధ్యక్షతన జరిగిన ఈ భేటీలో దేశంలోని తాజా రాజకీయ పరిణామాలు, ద్రవ్యోల్బణం, ప్రజాస్వామ్యంపై ప్రమాదం తదితర అంశాలపై చర్చించారు. రాహుల్ గాంధీ, ప్రియాంక గాంధీ, కేసీ వేణుగోపాల్ సహా పలువురు AICC సంస్థాగత కార్యదర్శులు, వివిధ రాష్ట్రాల PCC చీఫ్లు హాజరయ్యారు.

సమావేశంలో ధరల పెరుగుదలకు ప్రధాని నరేంద్ర మోదీ ప్రభుత్వ విధానాలే కారణమని కాంగ్రెస్ నేతలు ఆరోపించారు. మోదీ సర్కార్ ప్రజా వ్యతిరేక విధానాలను అమలు చేస్తోందని, ఓటు చోరీ, సీటు చోరీతో ప్రజాస్వామ్యాన్ని ప్రమాదంలో పడేస్తోందని విమర్శించారు. దీన్ని నిరసిస్తూ జూన్ నెలాఖరు నుంచి దేశవ్యాప్తంగా గ్రామ స్థాయిలో నిరసనలు చేపట్టాలని AICC నిర్ణయించింది. ఈ ఆందోళనలు రెండు నుంచి మూడు నెలల పాటు కొనసాగనున్నాయి.

మధ్యప్రదేశ్ నుంచి రాజ్యసభ ఎన్నికల కోసం దాఖలు చేసిన మీనాక్షి నటరాజన్ నామినేషన్ పత్రాలను రిటర్నింగ్ ఆఫీసర్ తిరస్కరించడంపై కాంగ్రెస్ తీవ్ర అసంతృప్తి వ్యక్తం చేసింది. ఎలాంటి సాక్ష్యాలు లేకుండానే నామినేషన్ తిరస్కరించడం అన్యాయమని, ఇది ప్రజాస్వామ్యానికి వ్యతిరేకమని కాంగ్రెస్ నేతలు ఆగ్రహం వ్యక్తం చేశారు. కేసీ వేణుగోపాల్ మాట్లాడుతూ, మీనాక్షి కేసులో రిటర్నింగ్ అధికారి ఏకపక్ష చర్య తీసుకోవడం, మరోవైపు జార్ఖండ్‌లో బీజేపీ అభ్యర్థి నామినేషన్‌ను అంగీకరించడం వివక్షకు నిదర్శనమన్నారు.

మీనాక్షి నటరాజన్ తన నామినేషన్ తిరస్కరణను సవాల్ చేస్తూ సుప్రీంకోర్టును ఆశ్రయించారు. రేపు ఈ పిటిషన్‌పై విచారణ జరగనుంది. అయితే, వెంటనే మధ్యంతర ఉత్తర్వులు జారీ చేయడానికి కోర్టు నిరాకరించింది. కాంగ్రెస్ నేతలు భూపేష్ బగేల్, అశోక్ గెహ్లాట్ లు కూడా ఈ తీరును తప్పుబట్టారు. ఇదే అంశంపై ఎన్ఎస్యూఐ కార్యకర్తలు ఢిల్లీలోని కేంద్ర ఎన్నికల సంఘం కార్యాలయం ముందు మెరుపు ధర్నా చేశారు. ఈఓ ఆఫీస్ లోపలికి వెళ్లేందుకు ప్రయత్నించగా పోలీసులు వారిని అడ్డుకుని స్టేషన్‌కు తరలించారు.

ద్రవ్యోల్బణాన్ని అదుపు చేయడంలో కేంద్రం విఫలమైందని మాజీ కేంద్ర మంత్రి కుమారి సెల్జా అన్నారు. ప్రభుత్వ ప్రజా వ్యతిరేక విధానాలపై గ్రామ స్థాయి నుంచి పోరాటం చేస్తామని AICC ప్రకటించింది.