ప్రభుత్వ ఉద్యోగాల క్యారెక్టర్ వెరిఫికేషన్ నిబంధనలు కఠినం చేసిన UP ప్రభుత్వం

ఉత్తర ప్రదేశ్ ప్రభుత్వం ప్రభుత్వ ఉద్యోగాల ప్రత్యక్ష నియామకాల్లో క్యారెక్టర్ వెరిఫికేషన్ నిబంధనలను కఠినం చేసింది. అలహాబాద్ హైకోర్టు ఆదేశాల మేరకు నియామక శాఖ ప్రిన్సిపల్ సెక్రెటరీ ఎం దేవరాజ్ కొత్త మార్గదర్శకాలను జారీ చేశారు.

అభ్యర్థుల నేర చరిత్ర, ప్రవర్తన నేపథ్యాన్ని ఇకపై మరింత క్షుణ్ణంగా పరిశీలిస్తారు. హింసాత్మక కార్యకలాపాలు, తీవ్రమైన నేరాల్లో పాల్గొన్న వారిపై కఠినంగా వ్యవహరించాలని ప్రభుత్వం స్పష్టం చేసింది.

కేవలం రాజకీయ సిద్ధాంతం ఉండటం వల్ల అభ్యర్థిని అనర్హుడిగా ప్రకటించరు. FIR నమోదు లేదా కేసు విచారణలో ఉండటం మాత్రమే ఉద్యోగ నిరాకరణకు కారణం కాదు. కేసు తీవ్రత, సంబంధిత పరిస్థితుల ఆధారంగా నిర్ణయం తీసుకుంటారు.

హత్య, అత్యాచారం, అవినీతి, తీవ్రవాదం, పేపర్ లీక్, సైబర్ నేరాల వంటి తీవ్రమైన కేసులపై కఠిన పరిశీలన ఉంటుంది. జిల్లా పోలీసులు, స్థానిక నిఘా విభాగం క్యారెక్టర్ వెరిఫికేషన్ నివేదికను 30 రోజుల్లోగా సమర్పించాలి.

నివేదిక ఆలస్యమైతే స్వీయ ధృవీకరణ ఆధారంగా తాత్కాలిక నియామక పత్రం ఇస్తారు. తప్పుడు సమాచారం ఇచ్చినట్టు తేలితే నియామకాన్ని రద్దు చేస్తారు. చట్టపరమైన చర్యలు కూడా తీసుకుంటారు.

ఈ మార్గదర్శకాలు ప్రభుత్వ శాఖలతో పాటు కార్పొరేషన్లు, కౌన్సిల్స్, స్థానిక సంస్థల్లోని ప్రత్యక్ష నియామకాలకు వర్తిస్తాయి.