ఆసియాన్ దేశాలతో ఉగ్రవాద నిరోధక అనుభవం పంచుకునేందుకు భారత్ సిద్ధం: రాజ్‌నాథ్ సింగ్

ఉగ్రవాదాన్ని ఎదుర్కోవడంలో తన అనుభవాన్ని ఆసియాన్ దేశాలతో పంచుకునేందుకు భారత్ సిద్ధంగా ఉందని రక్షణ మంత్రి రాజ్‌నాథ్ సింగ్ అన్నారు. ఫిలిప్పీన్స్‌లో జరిగిన ఆసియాన్ రక్షణ మంత్రుల సదస్సులో ఆయన ఈ విషయం చెప్పారు.

ప్రభుత్వ ప్రేరేపిత ఉగ్రవాద కార్యకలాపాలపై భారత్ కఠిన వైఖరిని ఆయన ప్రస్తావించారు. ఇందుకు ఉదాహరణగా ఆపరేషన్ సింధూను పేర్కొన్నారు. ఉగ్రవాదానికి వ్యతిరేకంగా తాము అనుసరించిన ప్రతి వ్యూహం యుద్ధ క్షేత్రంలో విజయవంతమైందని ఆయన గుర్తు చేశారు.

అంతర్జాతీయ వాణిజ్య మార్గాలు కొత్త రకమైన ముప్పులను ఎదుర్కొంటున్నాయని రాజ్‌నాథ్ సింగ్ చెప్పారు. ఈ తరుణంలో సముద్రయాన భద్రతపై కేవలం ప్రకటనలు జారీ చేస్తే సరిపోదని ఆయన అన్నారు. ఆ నిర్ణయాలను క్షేత్ర స్థాయిలో అమలు చేయాలని సూచించారు.

ఇండో-పసిఫిక్ ప్రాంతంలో శాంతి, స్వేచ్ఛ, నౌకాయానం కేవలం ఆకాంక్షగా ఉండకూడదని ఆయన అన్నారు. సమిష్టి కృషితో ఇందుకు సహకరించుకుందామని పిలుపునిచ్చారు. ఐరాస రూపొందించిన చట్టాలను అన్ని దేశాలు గౌరవించాలని ఆయన పరోక్షంగా చైనాను విమర్శించారు.

సముద్ర, వాయు మార్గాల్లో స్వేచ్ఛా రవాణా వల్ల అన్ని దేశాలు లబ్ధి పొందుతాయని రక్షణ మంత్రి స్పష్టం చేశారు.