₹200 కూపన్‌తో ₹50 లక్షల ఫార్చ్యూనర్ గెలిచిన 6 ఏళ్ల బాలుడు

మధ్యప్రదేశ్‌లోని బుర్హాన్‌పూర్ జిల్లాలో ఆరేళ్ల బాలుడు మేధాన్ష రైక్వార్ ఒక లక్కీ డ్రాలో ₹50 లక్షల విలువైన టయోటా ఫార్చ్యూనర్ కారును గెలుచుకున్నాడు. ఈ కూపన్ కోసం వారి కుటుంబం ఖర్చు చేసింది కేవలం ₹200 మాత్రమే.

బుర్హాన్‌పూర్‌లోని సిలంపురా గ్రామానికి చెందిన మేధాన్ష కుటుంబం మధ్యతరగతికి చెందినది. సుమారు ఏడాది క్రితం అభాపూర్‌లో జరిగిన గర్బా వేడుకల్లో ఏర్పాటు చేసిన లక్కీ డ్రా స్టాల్‌లో బాలుడి బామ్మ కిరణ్ రైక్వాల్ ₹200 ఇచ్చి ఒక కూపన్ కొన్నారు.

తన పేరు రాయకుండా మనవడు మేధాన్ష పేరును ఆమె ఆ కూపన్‌పై రాశారు. ఏడాది తర్వాత 2026లో డ్రా ఫలితాలు విడుదలయ్యాయి. ఫస్ట్ ప్రైజ్ బంపర్ లాటరీ మేధాన్ష పేరుకే వచ్చింది.

కొత్త కారు ఇంటికి రావడంతో కుటుంబంలో సంబరాలు నెలకొన్నాయి. బంధువులు, స్థానికులు బాలుడి ఇంటికి క్యూ కట్టారు. డప్పు మోతలు, బాణసంచా మధ్య చిన్నారికి కారుకు ఘన స్వాగతం పలికారు. కారుకు పూలమాల వేసి దిష్టి తీసి పూజలు నిర్వహించారు.

ఈ కుటుంబం గత రెండేళ్లుగా సొంత కారు కొనుక్కోవాలని కలలు కంటోంది. ఆ కల ఇప్పుడు చిన్న కారు కాకుండా ఫార్చ్యూనర్ రూపంలో నెరవేరింది.

ఈ చిన్నారి సెలబ్రేషన్ వీడియోలు సోషల్ మీడియాలో వైరల్ అవుతున్నాయి. ₹200 కూపన్‌తో ₹50 లక్షల కారు గెలిచిన ఈ ఘటన అదృష్టంపై నమ్మకాన్ని పెంచిందని నెటిజన్లు కామెంట్లు చేస్తున్నారు.