AICC లో సంస్థాగత మార్పులకు కాంగ్రెస్ సిద్ధం - ప్రియాంక గాంధీకి కీలక బాధ్యతలు

కాంగ్రెస్ పార్టీ అత్యవసర ఉన్నత స్థాయి సమావేశం జరుగుతున్న నేపథ్యంలో AICC లో త్వరలో సంస్థాగత మార్పులు జరగనున్నట్టు తెలుస్తోంది. ప్రియాంక గాంధీకి కీలక బాధ్యతలు అప్పగించే అవకాశం ఉందని పార్టీ వర్గాలు చెప్తున్నాయి. పలు రాష్ట్రాలకు ఇంచార్జ్లు మరియు అరడజన్ కు పైగా PCC అధ్యక్షులను కొత్తగా నియమించనున్నట్టు సమాచారం అందుతోంది.

ఈ సమావేశం తర్వాత ఏ క్షణంలోనైనా మార్పులు చేర్పులు జరగవచ్చని పార్టీ వర్గాలు పేర్కొంటున్నాయి. AICC లో సంస్థాగత మార్పులకు బ్లూప్రింట్ సిద్ధం చేసిన అధిష్టానం, AICC అధ్యక్షుడు మల్లికార్జున ఖర్గే నాయకత్వంలో చివరిసారిగా జరిగే మార్పులు ఇవేనని తెలుస్తోంది. వచ్చే ఏడాది చివరకు ఆయన పదవీ కాలం ముగియనున్న నేపథ్యంలో ఈ మార్పులకు ప్రాధాన్యత ఏర్పడింది.

రాబోయే లోక్సభ ఎన్నికలను దృష్టిలో పెట్టుకొని సంస్థాగతంగా కీలక మార్పులు చేయాలని అధినాయకత్వం నిర్ణయించింది. వచ్చే ఏడాది ప్రారంభంలో అసెంబ్లీ ఎన్నికలు జరగనున్న ఉత్తరప్రదేశ్, ఉత్తరాఖండ్, పంజాబ్, గోవా, మణిపూర్ రాష్ట్రాలపై ప్రత్యేక దృష్టి సారించింది కాంగ్రెస్ అధిష్టానం.

ఉత్తరప్రదేశ్ విషయంలో దళితులను ఆకర్షించే రీతిలో మార్పులు చేయాలని కాంగ్రెస్ భావిస్తోంది. ప్రస్తుతం రాష్ట్ర శాసన సభ పక్ష నాయకుడు, PCC అధ్యక్షుడు, ఇంచార్జ్ ముగ్గురూ అగ్రకులాలకు చెందిన వారు కావడంతో సామాజిక సమీకరణల దృష్ట్యా మార్పులు అవసరమని అభిప్రాయం వ్యక్తమవుతోంది.

ప్రస్తుతం AICC జనరల్ సెక్రటరీగా ఉన్న ప్రియాంక గాంధీకి మరింత కీలక బాధ్యతలు అప్పగించే అవకాశం ఉందని పార్టీ వర్గాలు గట్టిగా చెప్తున్నాయి. అయితే ఏ బాధ్యతలు అప్పగిస్తారనే విషయంలో ఇంకా అధికారిక నిర్ణయం తెలియలేదు. సంస్థాగత వ్యవహారాల ఇంచార్జ్ జనరల్ సెక్రటరీ KC వేణుగోపాల్ మాత్రం మరికొంత కాలం కొనసాగే అవకాశం ఉందని తెలుస్తోంది.

INDIA కూటమి సమావేశం జరిగిన నేపథ్యంలో ప్రభుత్వానికి వ్యతిరేకంగా పార్లమెంట్ లో పోరాటం చేసేందుకు, ప్రజా పోరాటాలు నిర్వహించేందుకు కార్యాచరణ రూపొందించుకున్న కాంగ్రెస్ పార్టీ, అందుకు అనుగుణంగా సంస్థాగత బలోపేతానికి ఈ మార్పులు చేపట్టనున్నది.