హైడ్రా టెండర్లలో అవకతవకలు జరిగాయని కాంట్రాక్టర్ల నిరసన

హైడ్రా మాన్సూన్ టెండర్లలో అవకతవకలు జరిగాయని ఆరోపిస్తూ కొంతమంది కాంట్రాక్టర్లు హైడ్రా కార్యాలయం ముందు ఆందోళనకు దిగారు. టెండర్లు పారదర్శకంగా నిర్వహించాలని వారు డిమాండ్ చేశారు. ఐదుగురు కాంట్రాక్టర్లకు మాత్రమే పనులు దక్కేలా కొత్త నిబంధనలు పెట్టారని విమర్శించారు. అవకతవకలపై హైడ్రా చీఫ్ రంగనాథ్‌ను కలవడానికి వెళ్తే మార్షల్ వారిని గెంటేశారని కాంట్రాక్టర్లు ఆరోపించారు.

GHMC లో మాన్సూన్ ఎమర్జెన్సీ టీమ్స్ పేరుతో భారీగా ఖర్చు చేస్తూ ప్రభుత్వానికి నష్టం కలిగిస్తున్నారని కాంట్రాక్టర్లు పేర్కొన్నారు. గతంలో ఒక వార్డుకు 15 లక్షల రూపాయలతో మాన్సూన్ పనులు పూర్తయ్యేవని, ఇప్పుడు హైడ్రా ఒక సర్కిల్‌కు కోటి 30 లక్షల రూపాయలు కేటాయిస్తోందని వారు వివరించారు. ఈ విధంగా 300 కోట్ల రూపాయల టెండర్లు పిలవడం జరిగిందని ఆందోళన వ్యక్తం చేశారు.

ప్రతి ఏజెన్సీకి ఒక్కో పని ఇస్తే ఎక్కువ మంది కాంట్రాక్టర్లకు అవకాశం దొరుకుతుందని, పని నాణ్యత కూడా మెరుగుపడుతుందని కాంట్రాక్టర్లు అభిప్రాయపడ్డారు. అర్హత ఉన్న కాంట్రాక్టర్లకు పనులు ఇవ్వకుండా కొంతమంది అధికారులు నిర్దిష్ట కాంట్రాక్టర్లకు అనుకూలంగా వ్యవహరిస్తున్నారని ఆరోపించారు. గత సంవత్సరం అదే నిబంధనల ప్రకారం టెండర్ పొందిన ఏజెన్సీలను ఈ సంవత్సరం తిరస్కరించారని, దీనికి సరైన కారణం చెప్పలేదని నిరసనకారులు తెలిపారు.