టీచర్ల నైపుణ్యం కోసం విదేశాలకు పంపాలి: సీఎం రేవంత్ రెడ్డి ప్రతిపాదన

హైదరాబాద్: టీచర్ల నైపుణ్యాభివృద్ధికి విదేశాలకు పంపడం ద్వారా వారిలో స్ఫూర్తి నింపాలని సీఎం రేవంత్ రెడ్డి సూచించారు. ఐఏఎస్, ఐపీఎస్ అధికారులకు స్టడీ లీవ్ మంజూరు చేసి విదేశాలకు పంపుతున్నట్లే, టీచర్లకు కూడా అవకాశం కల్పించాలని ప్రతిపాదించారు.

ఈ మేరకు ఆయన ఎంసీఆర్ హెచ్ఆర్డీ ఇన్స్టిట్యూట్‌లో మాట్లాడారు. రాష్ట్రంలోని ప్రభుత్వ పాఠశాలల్లో పనిచేస్తున్న ఉపాధ్యాయులకు ఇక్కడ ఫౌండేషన్ కోర్సు ఇవ్వాలని, విదేశీ నిపుణులతో గెస్ట్ లెక్చర్స్ ఏర్పాటు చేయాలని ఆయన సూచించారు. ఇటీవల నియమితులైన గ్రూప్-1, గ్రూప్-2 అధికారులతోపాటు, టీచర్లకు కూడా ఈ శిక్షణ ఇవ్వాలని చెప్పారు.

'ఏడాదికి 10 నుంచి 12 మంది టీచర్లను విదేశాలకు పంపించి, ఫీజు చెల్లించి చదివించాలి. హార్వర్డ్, స్టాన్ఫర్డ్ వంటి యూనివర్సిటీల్లో ప్రవేశం కల్పించాలి' అని సీఎం పేర్కొన్నారు. వారిలో పోటీతత్వం పెంచి, స్ఫూర్తిదాయకంగా ఉండాలని అభిప్రాయపడ్డారు.

ఇంజనీరింగ్ విద్య విషయంలో కూడా రేవంత్ రెడ్డి ఆందోళన వ్యక్తం చేశారు. రాష్ట్రంలో 19 ప్రభుత్వ ఇంజనీరింగ్ కళాశాలల్లో 24 వేల మంది విద్యార్థులు ఉన్నారని, వారికి తొలి రెండేళ్లు ప్రాథమిక విద్య, తర్వాత రెండేళ్లు నైపుణ్యాభివృద్ధిపై దృష్టి పెట్టాలని సూచించారు. జర్మన్ వంటి భాషలు నేర్పించి, విదేశాలకు పంపే ప్రణాళికలు సిద్ధం చేయాలన్నారు.

ఇంజనీరింగ్ పట్టా పొందినా ఉద్యోగం పొందలేని పరిస్థితిపై ఆయన విచారం వ్యక్తం చేశారు. 'ఇంజనీరింగ్ చదివినా ఒక జాబ్ అప్లికేషన్ కూడా రాయలేని విద్యార్థులు ఉన్నారు. స్కిల్స్ నేర్చుకోవడం లేదు' అని వివరించారు. ప్రభుత్వ ఇంజనీరింగ్ కళాశాలల్లోనే ఉద్యోగ హామీ ఇవ్వగల సామర్థ్యం కల్పించాలని చెప్పారు.