మొక్కజొన్న పంటలో కత్తెర పురుగు నివారణ: నిపుణుల సూచనలు

నాగర్కర్నూల్ జిల్లాలో మొక్కజొన్న పంటకు కత్తెర పురుగు ముప్పు పొంచి ఉంది. పాలెం కృషి విజ్ఞాన కేంద్రం శాస్త్రవేత్త శైలజ రైతులకు పంట కాపాడే చర్యలను సూచించారు.

రెండు మూడేళ్లుగా ఈ పురుగు వల్ల తెలుగు రాష్ట్రాల్లో రైతులు తీవ్రంగా నష్టపోయారు. ప్రస్తుత ఖరీఫ్ సీజన్‌లో పంట 10-30 రోజుల దశలో ఉన్న ఈ సమయంలో అప్రమత్తత అవసరమని ఆమె తెలిపారు.

కత్తెర పురుగు తల్లి పురుగు సుమారు 1500-2000 గుడ్లు పెడుతుంది. గుడ్ల నుంచి బయటకు వచ్చే పిల్ల పురుగులు ఆకు పత్రహరితాన్ని గోకి తినడంతో జలకులు ఏర్పడతాయి. లార్వా దశలో ఇవి ఆకులు, కాండం, సుడిని కత్తిరించి పంటను దెబ్బతీస్తాయి. పంట చివరి దశలో కంకిని కూడా ఆశిస్తాయి.

పురుగు నివారణకు మూడు దశల్లో చర్యలు చేపట్టాలని శైలజ సూచించారు. మొదటి 30 రోజుల్లో ఎకరానికి 5-10 లింగాకర్షక బుట్టలు ఏర్పాటు చేయాలి. గుడ్ల సముదాయాలను తొలగించాలి. వేపనూనె 5% (అజాడిరెక్టిన్ 1500 ppm) పిచికారీ చేస్తే గుడ్లు పొదగకుండా నివారించవచ్చు. 30-60 రోజుల దశలో సుడుల్లో లార్వా కనిపించగానే ఎమామిక్టిన్ బెన్జోయేట్, స్పైనోసాడ్ లేదా క్లోరాంట్రనిలిప్రోల్ వంటి మందులను మార్చి మార్చి పిచికారీ చేయాలి. ఎదిగిన లార్వాలకు విషపు ఎరగా 10 కిలోల వరి తవుడు, 2 కిలోల బెల్లం, 100 గ్రాముల థయోడికార్బ్ కలిపిన ముద్దలను సుడుల్లో వేయాలి.

60 రోజుల తర్వాత మొక్క బలంగా తయారవుతుంది. మొదటి 60 రోజుల్లో సమర్ధవంతంగా నివారణ చేస్తే మంచి దిగుబడి సాధించవచ్చని శైలజ తెలిపారు.