పిల్లల కోసం AIతో భాష నేర్పించే 'కూల్ఫాబెట్స్' యాప్: తెలుగుతో పాటు 5 భాషల్లో

NRIs టెక్నాలజీ నిపుణుడు కొల్లు రంజిత్ 'కూల్ఫాబెట్స్' పేరుతో ఒక AI ఆధారిత భాషా నేర్చుకునే మొబైల్ యాప్‌ను రూపొందించారు. ఈ యాప్ పిల్లలకు తెలుగు, హిందీ, మరాఠి, తమిళ్, కన్నడ భాషల్లో రాయడం, చదవడం నేర్పించేందుకు ప్రత్యేకంగా రూపొందించినట్టు ఆయన తెలిపారు.

ఇంటర్నెట్ అవసరం లేకుండా ఆఫ్లైన్‌లో పనిచేసే ఈ యాప్, AI ద్వారా పిల్లలు రాసే ప్రతి అక్షరాన్ని సరిచూస్తుంది. అక్షరాలు, గుణింతాలు, పదాలు, వాక్యాలు వంటి దశల వారీగా భాష నేర్పించే ఈ యాప్‌ను 10 ఏళ్ళుగా అభివృద్ధి చేసినట్టు రంజిత్ వివరించారు.

పిల్లలు బోర్ కొట్టకుండా సరదాగా నేర్చుకునేలా యాప్‌లో 45 రకాల గేమ్స్ ఉన్నాయి. ఒక్కొక్క లెవెల్ పూర్తి చేస్తూ పిల్లలు వారంతట వారే భాష నేర్చుకునేలా గేమిఫికేషన్ పద్ధతులు అమలు చేశారు. పిక్చర్-వర్డ్ గేమ్, ఫ్యామిలీ గేమ్ వంటివి కూడా ఉన్నాయి.

అమెరికాలో తన పిల్లలు తెలుగు భాషా పాఠశాలలకు వెళ్లడానికి ఇష్టపడని సంఘటనతో ఈ యాప్ ఆలోచన వచ్చినట్టు రంజిత్ తెలిపారు. ప్రవాసాంధ్రుల పిల్లలు మాతృభాష మర్చిపోవడాన్ని గమనించి, వారికి సులువుగా భాష నేర్పించే ప్రయత్నంగా దీన్ని రూపొందించారు.

ఈ యాప్‌ను వివిధ పాఠశాలలకు పరిచయం చేసి, గ్రామీణ ప్రాంతాల్లోని ప్రభుత్వ పాఠశాలల విద్యార్థులకు ఉచితంగా అందించాలని యోచిస్తున్నట్టు ఆయన చెప్పారు. భవిష్యత్తులో ఇతర భాషలకు కూడా విస్తరించే ప్రణాళిక ఉంది.