పత్తి పంటకు బెట్ట, వర్షాల సమయంలో ఎరువుల యాజమాన్యంపై శాస్త్రవేత్త సూచనలు

తెలుగు రాష్ట్రాల్లోని వర్షాధార పత్తి సాగు ఈ ఏడాది ఆలస్యమైంది. నైరుతి రుతుపవనాలు త్వరగా వచ్చినా తగినన్ని వర్షాలు లేకపోవడంతో కొన్ని ప్రాంతాల్లో బెట్ట పరిస్థితులు ఏర్పడ్డాయి. మరికొన్ని చోట్ల అక్కడక్కడ వర్షాలు కురుస్తున్నాయి. ఈ పరిస్థితుల్లో పంటను కాపాడుకునేందుకు పాటించాల్సిన పద్ధతులను శాస్త్రవేత్త డాక్టర్ జి. చిట్టిబాబు తెలియజేశారు.

ఆయన సూచనల ప్రకారం, పత్తి పంటకు సాధారణంగా ఎకరానికి 50 కిలోల DAP, 75-80 కిలోల యూరియా, 45-50 కిలోల పొటాష్ (MOP) అందించాలి. బెట్ట పరిస్థితుల్లో పంట పసుపు రంగులోకి మారి ఎండిపోయినట్లు కనిపిస్తే, వేగంగా కోలుకునేందుకు కొన్ని ద్రావణాలను పిచికారీ చేయాలి. 19:19:19 లేదా 13:0:45 (పొటాషియం నైట్రేట్) అనే మందుని లీటర్ నీటికి 10 గ్రాముల చొప్పున కలిపి పిచికారీ చేయడం వల్ల పంట బెట్ట నుంచి కోలుకుంటుంది.

వాతావరణ శాఖ ఈ ఏడాది ఆగస్టు-సెప్టెంబరు నెలల్లో భారీ వర్షాలు ఉంటాయని హెచ్చరించింది. ఆ సమయంలో పొలంలో నీరు నిలిస్తే పంట ఎదుగుదల ఆగిపోయి పండాకు తెగులు (గులాబీ రంగు ఆకు) సోకే ప్రమాదం ఉంది. దీని నివారణకు రైతులు ఎకరాకు 15-20 కిలోల యూరియా, 5-10 కిలోల పొటాష్‌ను బూస్టర్ డోసుగా వేయాలి. లేదా 2% యూరియా ద్రావణం, 13:0:45 ని 10 గ్రాముల చొప్పున నీటిలో కలిపి పిచికారీ చేసుకోవచ్చు. మెగ్నీషియం లోపం కనిపిస్తే మెగ్నీషియం సల్ఫేట్ ను లీటర్ నీటికి 10 గ్రాముల చొప్పున పిచికారీ చేయాలని డాక్టర్ చిట్టిబాబు తెలిపారు.