పత్తి సాగులో ఎరువులు, కలుపు యాజమాన్యం: కేవీకే శాస్త్రవేత్త సూచనలు

తెలంగాణ రాష్ట్రంలో పత్తి సాగు విస్తీర్ణం ఈ వానకాలంలో 50 లక్షల ఎకరాలకు చేరే అవకాశం ఉందని బెల్లంపల్లి కృషి విజ్ఞాన కేంద్రం (కేవీకే) శాస్త్రవేత్త తిరుపతి తెలిపారు. ప్రస్తుతం పత్తి 20 నుంచి 25 రోజుల దశలో ఉండగా, అక్కడక్కడ పడిన వర్షాలతో మొలకలు ఆలస్యంగా వచ్చాయి. రికవరీ కోసం సమగ్ర ఎరువుల యాజమాన్యం పాటించాలని ఆయన రైతులకు సూచించారు.

శాస్త్రవేత్త సిఫారసు ప్రకారం, ఎకరాకు 45 కిలోల నత్రజని (85-90 కిలోల యూరియా రూపంలో, 3-4 దఫాలుగా), 24 కిలోల భాస్వరం (150 కిలోల సింగిల్ సూపర్ ఫాస్ఫేట్ లేదా 50 కిలోల డీఏపీ రూపంలో), 24 కిలోల పొటాష్ (ఎంఓపీ) వేయాలి. భాస్వరం ఎరువును అంతర దుక్కిలో లేదా విత్తిన 10-15 రోజుల లోపు ఇవ్వాలి. నత్రజని, పొటాష్ ఎరువులను విత్తిన 20-25 రోజుల తర్వాత 25 రోజుల వ్యవధిలో మూడు నుంచి నాలుగు దఫాలుగా వేస్తే మొక్కల పెరుగుదల, దిగుబడి మెరుగవుతాయి.

పత్తికి జింక్, మెగ్నీషియం లోపాలు సర్వసాధారణం. ఆకు ఈనెలు ఆకుపచ్చగా ఉండి మధ్యభాగం పసుపు రంగులోకి మారితే జింక్ లోపాన్ని సూచిస్తుంది. నివారణకు లీటర్ నీటికి 2 గ్రాముల జింక్ సల్ఫేట్ కలిపి పిచికారీ చేయాలి. వర్షాభావ పరిస్థితుల్లో ఎదుగుదలకు నానో యూరియా లేదా 19:19:19 ఎరువు ద్రావణం పిచికారీ చేయడం మంచిదని సూచించారు.

కలుపు నివారణకు తొలి దశలో విత్తిన 48 గంటల లోపు పెండిమిథాలిన్ 38.5% ఈసీ ద్రావణాన్ని 700 మి.లీ. 200 లీటర్ల నీటిలో కలిపి పిచికారీ చేయాలి. నెల రోజుల్లో గడ్డి జాతి కలుపులు ఉంటే క్విజలోఫాప్ ఇథైల్ 450 మి.లీ. 200 లీటర్ల నీటిలో, వెడల్పాటి ఆకు కలుపులు ఉంటే బిస్పైరిబాక్ సోడియం వాడాలి. రెండు రకాల కలుపులు ఉంటే హిట్‌వీడ్ మాక్స్ (పైరిథియోబాక్ సోడియం + ప్రొపాక్విజాఫాప్) 400-500 మి.లీ. 200 లీటర్ల నీటిలో కలిపి పిచికారీ చేయడం సమర్థవంతంగా ఉంటుంది. అదనంగా, ప్రతి 20 రోజులకు ఒకసారి 80 రోజుల వరకు గొర్రు, గుంటకతో అంతరకృషి చేస్తే మొక్కల పెరుగుదల బాగా జరిగి దిగుబడి పెరుగుతుందని ఆయన వివరించారు.