Cough Syrup కొనేందుకు ఇకపై డాక్టర్ ప్రిస్క్రిప్షన్ తప్పనిసరి: కేంద్రం కీలక నిర్ణయం

కఫ్ సిరప్‌లను ఇకపై ప్రిస్క్రిప్షన్ లేకుండా విక్రయించకూడదని కేంద్ర ప్రభుత్వం కీలక నిర్ణయం తీసుకుంది. డ్రగ్ రూల్స్‌లోని Schedule K ని సవరిస్తూ కేంద్ర ఆరోగ్య, కుటుంబ సంక్షేమ మంత్రిత్వ శాఖ ఈ నోటిఫికేషన్ విడుదల చేసింది.

మధ్యప్రదేశ్, రాజస్థాన్ రాష్ట్రాల్లో ఇటీవల కల్తీ కఫ్ సిరప్ సేవించి నలుగురు చిన్నారులు మృతి చెందిన ఘటనల నేపథ్యంలో ఈ చర్య తీసుకున్నట్లు అధికారులు తెలిపారు. ఈ సంఘటనలతో ఔషధ నాణ్యత, భద్రతపై దేశవ్యాప్తంగా ఆందోళనలు రేగాయి. రోగుల భద్రతే ప్రధానం కాబట్టి ఈ నిర్ణయం తీసుకున్నామని మంత్రిత్వ శాఖ వివరించింది.

నూతన నిబంధన ప్రకారం, ఇప్పటివరకు ఓవర్ ద కౌంటర్‌గా అందుబాటులో ఉన్న కఫ్ సిరప్‌లను డాక్టర్ సలహాతోనే కొనుగోలు చేయాలి. ఫార్మసీల్లో ఈ మందులను ప్రిస్క్రిప్షన్ లేకుండా ఇవ్వడం చట్టవిరుద్ధం. ఈ నిర్ణయం దేశవ్యాప్తంగా ఔషధ విక్రయ విధానంలో పెను మార్పు తీసుకువచ్చింది.

మరోవైపు, ఈ నిబంధన వల్ల మెడికల్ షాపుల అమ్మకాలు 70 శాతం వరకు తగ్గుతాయని కొందరు ఫార్మాసిస్ట్లు ఆందోళన వ్యక్తం చేస్తున్నారు. అలాగే, డాక్టర్ కన్సల్టేషన్ ఖర్చు భరించలేని లోయర్ ఇన్‌కమ్ గ్రూప్ ప్రజలు ఇబ్బందులు పడే ప్రమాదం ఉందని వారు హెచ్చరిస్తున్నారు. ప్రభుత్వం అన్ని వర్గాల ఆందోళనలను పరిగణనలోకి తీసుకోవాలని ఫార్మసీల యజమానులు కోరుతున్నారు.