ముంబై: హౌసింగ్ సొసైటీలో క్రేన్ కూలి 21 ఏళ్ల యువకుడి మృతి, పలు వాహనాలు ధ్వంసం

ముంబైలోని ఒక హౌసింగ్ సొసైటీలో శనివారం సాయంత్రం భారీ క్రేన్ కూలిన ప్రమాదంలో 21 ఏళ్ల యువకుడు మృతి చెందాడు. ఈ ఘటనలో మరో వ్యక్తి గాయపడ్డాడు.

పోలీసులు తెలిపిన వివరాల ప్రకారం, జెపి డెవలపర్ అనే సంస్థ సొసైటీకి ఆనుకుని ఉన్న పార్కింగ్ భవన నిర్మాణం చేపట్టింది. అనుమతి లేకుండానే 7 అంతస్తులకు బదులు 14 అంతస్తులు నిర్మించినట్లు స్థానికులు ఆరోపించారు. నిబంధనలకు విరుద్ధంగా ఆ నిర్మాణ సంస్థ సాయంత్రం 6 గంటల తర్వాత కూడా అర్ధరాత్రి వరకు పనులు కొనసాగించినట్లు సొసైటీ సభ్యులు తెలిపారు.

ప్రమాదంలో టెనెంట్ అయిన 21 ఏళ్ల యువకుడు మరణించగా, 22 నుంచి 25 వరకు కార్లు, స్కూటర్లు ధ్వంసమయ్యాయి. సుమారు రూ. 40-50 లక్షల విలువైన డీజీ సెట్ కూడా దెబ్బతిన్నది. సమాచారం అందుకున్న అగ్నిమాపక, పోలీసు బృందాలు ఘటనాస్థలానికి చేరుకుని సహాయక చర్యలు చేపట్టాయి.

ప్రమాదం జరిగిన స్థలానికి సమీపంలో 32 అంతస్తుల నివాస టవర్ ఉండగా, ఇటీవలే దానికి పొసెషన్ ఇచ్చారు. క్రేన్ ఆ టవర్‌పైకి పడి ఉంటే పెద్ద విషాదం చోటు చేసుకునేదని స్థానికులు చెప్పారు.

సొసైటీ వాసులు నెలల తరబడి పోలీసులకు ఫిర్యాదు చేసినా ఎలాంటి చర్యలు తీసుకోలేదని ఆరోపించారు. నిర్మాణ సంస్థ అనుమతి ఉల్లంఘించి, భద్రతా ప్రమాణాలను పాటించలేదని, ప్రమాదానికి కారణమైందని ఆరోపిస్తూ, బాధ్యులు కఠిన చర్యలు ఎదుర్కొనే వరకు మృతదేహాన్ని స్వీకరించబోమని సొసైటీ నివాసితులు తెలిపారు.

పోలీసులు కేసు నమోదు చేసుకుని, నిర్మాణ సంస్థపై చర్యల కోసం దర్యాప్తు ప్రారంభించారు.