అమరావతి నిర్మాణానికి CRDA భూసేకరణ వేగవంతం — 2,766 ఎకరాలు పెండింగ్

అమరావతి రాజధాని నిర్మాణం కోసం CRDA భూసేకరణ ప్రక్రియను వేగవంతం చేసింది. 28 గ్రామాల పరిధిలో ఇంకా 2,766 ఎకరాలు సేకరించాల్సి ఉంది. ఈ భూములు అందకపోవడం వల్ల రహదారులు, మౌలిక వసతుల నిర్మాణానికి అడ్డంకులు ఏర్పడుతున్నాయి.

217 చదరపు కిలోమీటర్ల రాజధాని పరిధిలో ఇంకా కొందరు భూముల్ని ఇవ్వలేదు. CRDA ఇప్పటికే 720 ఎకరాలకు సంబంధించి 74 నోటిఫికేషన్లు విడుదల చేసింది. ప్రాజెక్టుల వారిగా అవసరమైన భూముల కోసం విడివిడిగా నోటిఫికేషన్లు జారీ చేస్తున్నారు.

భూసేకరణ నోటిఫికేషన్లతో పాటు భూసమీకరణ పద్ధతిలో ముందుకు వచ్చే రైతులకు ఆ అవకాశం కల్పిస్తున్నారు. ఇటీవల రైతులు 30 ఎకరాల వరకు భూసమీకరణలో ఇచ్చారు. మరికొందరు ముందుకు రావచ్చని CRDA అంచనా వేస్తోంది.

నోటిఫికేషన్లు జారీ చేసిన గ్రామాల్లో గ్రామసభలు నిర్వహిస్తున్నారు. భూసమీకరణ వల్ల కలిగే ప్రయోజనాలు, భూసేకరణ వల్ల కలిగే నష్టాలు రైతులకు వివరిస్తున్నారు.

పెండింగ్ భూముల్లో ఉండవల్లిలో 741 ఎకరాలు, పెనుమాకలో 378 ఎకరాలు, నెడమర్రి పరిధిలో 432 ఎకరాలు ఉన్నాయి. కురగల్లు, నేరుకొండ, రాయపుడి గ్రామాల్లో 200 ఎకరాలకు పైగా అవసరం ఉంది. చాలా గ్రామాల్లో పెండింగ్ భూమి 20 ఎకరాలలోపే ఉంది.