సైబరాబాద్‌లో స్ట్రీట్ ఫుడ్ హబ్‌ల ప్రణాళిక.. కేంద్ర ప్రతినిధులతో CMC అధికారుల భేటీ

సైబరాబాద్ మున్సిపల్ కార్పొరేషన్ (CMC) అధికారులు కేంద్ర గృహ, పట్టణ వ్యవహారాల మంత్రిత్వ శాఖ ప్రతినిధులతో సమావేశమయ్యారు. ఈ భేటీలో PM SVANidhi పథకం కింద స్ట్రీట్ ఫుడ్ హబ్‌ల అభివృద్ధి ప్రణాళికపై చర్చించారు.

CMC ప్రధాన కార్యాలయంలో జరిగిన సమావేశంలో కేంద్ర ప్రతినిధులు అనిల్ ప్రకాష్, జయేష్ కుమార్, CMC కమిషనర్, అదనపు కమిషనర్ పాల్గొన్నారు. స్ట్రీట్ ఫుడ్ హబ్‌ల ద్వారా ప్రజలకు పరిశుభ్రమైన నీరు, నాణ్యమైన ఆహారం అందుబాటు ధరలకు అందించాలని ప్రతిపాదించారు. ఆటో డ్రైవర్లు, కార్మికులు, విద్యార్థులు, కుటుంబాలు సహా అన్ని వర్గాల ప్రజలకు ఈ హబ్‌లు అందుబాటులో ఉండేలా ప్రణాళికలు రూపొందిస్తున్నారు.

ప్రచారం కోసం సెలబ్రిటీలు, సోషల్ మీడియా ఇన్ఫ్లుయెన్సర్లు, యూట్యూబర్లు, క్రీడాకారులను వినియోగించాలని అధికారులు ప్రతిపాదించారు. పర్యావరణ పరిరక్షణపై ప్రత్యేక దృష్టి పెట్టాలని, ఆహార వ్యర్ధాల నుంచి బయోగ్యాస్ ఉత్పత్తి, సోలార్ ప్యానెల్స్ ద్వారా విద్యుత్ ఉత్పత్తి చేపట్టాలని సూచించారు. హబ్‌లలో వెదురు, రాయి, గ్రానైట్, రీసైకిల్ మెటీరియల్‌తో ఫర్నిచర్ ఏర్పాటు చేయాలని తెలిపారు. స్మార్ట్ టాయిలెట్లు, తాగునీటి సౌకర్యాలు కల్పించాలని, ఫుడ్ స్టాల్స్ పరిశుభ్రతను హైజీన్ ఇండెక్స్ ద్వారా పర్యవేక్షించాలని నిర్ణయించారు.

ధనిక, పేద తేడా లేకుండా అందరూ కలిసి భోజనం చేసే సామాజిక వేదికగా ఈ హబ్‌లను అభివృద్ధి చేయనున్నట్లు అధికారులు వెల్లడించారు. నిర్వహణ బాధ్యతలు స్వయం సహాయక సంఘాల మహిళలకు అప్పగించాలని ప్రతిపాదించారు. ప్రతివారం సాంస్కృతిక, వినోద కార్యక్రమాలు నిర్వహించడంతోపాటు వివిధ రాష్ట్రాల కళలు, సంగీతం, నృత్యాలు, వంటకాలను ప్రదర్శించే వేదికగా తీర్చిదిద్దాలని సూచించారు.

మలకం చెరువు వద్ద ప్రతిపాదిత స్ట్రీట్ ఫుడ్ హబ్‌కు ప్రత్యేక బస్ సర్వీస్ అవకాశాలు, పర్యాటక ప్రాంతాలతో అనుసంధానం వంటి అంశాలపై చర్చించారు. స్ట్రీట్ ఫుడ్ విక్రేతలు, స్వయం సహాయక సంఘాల మహిళల అభిప్రాయాలు సేకరించి, ప్రజలకు అనుకూలంగా పరిశుభ్రమైన స్ట్రీట్ ఫుడ్ హబ్‌ల అభివృద్ధికి CMC కమిషనర్ సూచించారు.