వర్షం పడిన రోజుల్లో ఉద్యోగులకు వర్క్ ఫ్రమ్ హోమ్ ఇవ్వాలి: ఐటీ కంపెనీలకు సైబరాబాద్ పోలీసుల సలహా

హైదరాబాద్‌లో వర్షాకాలంలో ఐటీ కారిడార్‌లో తీవ్రమైన ట్రాఫిక్ సమస్యలను నివారించేందుకు సైబరాబాద్ పోలీసులు కీలక సూచనలు చేశారు. వర్షం పడే రోజుల్లో ఉద్యోగులకు వర్క్ ఫ్రమ్ హోమ్ అవకాశం కల్పించాలని, లాగిన్-లాగౌట్ షిఫ్ట్ టైమింగ్స్‌లో మార్పులు చేయాలని కోరారు.

ఐటీ కారిడార్‌లో దాదాపు 10 లక్షల మందికి పైగా ఉద్యోగులు పనిచేస్తున్నారు. వీరిలో సగానికి పైగా సొంత వాహనాల్లోనే ఆఫీసులకు వస్తుండటంతో, ట్రాఫిక్ తీవ్రంగా మారుతోంది. ముఖ్యంగా వర్షం పడితే రోడ్లపై నీరు నిలవడం, డ్రైనేజీ లోపాలు, వాటర్ లాగింగ్ వల్ల సమస్య మరింత పెరుగుతుందని ఉద్యోగులు తెలిపారు. కొన్ని ప్రాంతాల్లో ఆఫీసు నుంచి ఇంటికి చేరేందుకు 4-5 గంటలు పట్టిన దాఖలాలు ఉన్నాయి.

పోలీసులు చెప్పిన వివరాల ప్రకారం, ఐటీ సంస్థల్లో హైబ్రిడ్ పని విధానంలో భాగంగా వారంలో రెండు రోజులు తప్పనిసరిగా ఆఫీసుకు రావాలి. ముఖ్యంగా మంగళ, బుధవారాల్లో హాజరు ఎక్కువగా ఉండి, రోజుకు 13 లక్షల వాహనాలు రోడ్లపైకి వస్తుండగా, సాధారణ రోజుల్లో 10-11 లక్షల మధ్య ఉంటుంది. ఈ ఒత్తిడిని తగ్గించేందుకు ఒకేసారి కాకుండా అర్ధగంట, గంట వ్యవధిలో స్టాగర్డ్ లాగౌట్ ఇచ్చేలా సంస్థలు ప్రణాళికలు రూపొందించాలని సైబరాబాద్ ట్రాఫిక్ విభాగం సూచించింది.

గత ఏడాది కూడా ఇదే తరహా సమస్యలు ఎదురైన నేపథ్యంలో, పోలీసులు తిరిగి ఈ చర్యలు అమలు చేస్తామని తెలిపారు. ఐసీఎస్సీ (ICSC) అనే స్వతంత్ర ఏజెన్సీ ద్వారా వాతావరణ పరిస్థితిని బట్టి ముందస్తుగా ఐటీ కంపెనీలకు అడ్వైజరీలు పంపిస్తామని పేర్కొన్నారు. జంక్షన్ల వద్ద ట్రాఫిక్ సిబ్బందిని పెంచడం, నీటి నిల్వలు గుర్తించి డ్రైనేజీ సమస్యల పరిష్కారానికి జీహెచ్ఎంసీతో కలిసి చర్యలు తీసుకుంటామన్నారు.

కంపెనీలు, పోలీసులు, జీహెచ్ఎంసీ సమన్వయంతో పనిచేస్తేనే వర్షాకాలంలో ఐటీ కారిడార్ ట్రాఫిక్ కష్టాలకు చెక్ పెట్టే అవకాశం ఉందని అధికారులు భావిస్తున్నారు.