అర్నబ్ తుఫాను ప్రభావం: గుంటూరు, బాపట్ల జిల్లాల్లో భారీ వర్షాలు

అర్నబ్ తుఫాను ప్రభావం ఉమ్మడి గుంటూరు జిల్లాపై పడింది. బాపట్ల తీర ప్రాంతంలో చెట్లు నేలకొరిగాయి. నిన్న రాత్రి నుంచి ఎడతెరపి లేకుండా వర్షం కురుస్తోంది.

గుంటూరు జిల్లాలో ఇవాళ ఉదయం వరకు సగటున 5 సెం.మీ వర్షపాతం నమోదైంది. బాపట్ల జిల్లాలో 8 సెం.మీ పైగా నమోదైనట్టు అధికారులు తెలిపారు. ఈ వర్షాలతో జనజీవనం తీవ్రంగా ప్రభావితమైంది. అత్యవసరం అయితే తప్ప బయటికి రావద్దని అధికారులు ముందుగానే హెచ్చరికలు జారీ చేశారు.

బాపట్ల జిల్లాలో భారీగా ఈదురుగాలులు వీచాయి. కొన్ని చోట్ల చెట్లు, కొమ్మలు విరిగి రోడ్లపై పడ్డాయి. కొన్ని ఇళ్ల కప్పులు కూడా ఎగిరిపోయాయి. అగ్నిమాపక శాఖ, పోలీస్, రెవెన్యూ అధికారులు ఇవాళ ఉదయం నుంచే రోడ్లపైకి వచ్చారు. పడిపోయిన కొమ్మలను తొలగించి రాకపోకలకు ఇబ్బంది లేకుండా చేశారు.

గుంటూరు నగరంలోని గుజ్జనగుండ్ల-కొరటపాడు మార్గంలో వర్షపు నీరు నిలిచింది. మోకాలి లోతు నీటిలో వాహనాలు నెమ్మదిగా ముందుకు సాగుతున్నాయి. డ్రైనేజీ పనులు పూర్తికాకపోవడంతో వర్షం పడినప్పుడల్లా ఇదే సమస్య వస్తోంది. నీరు నిలవడంతో దుర్గంధం కూడా వస్తోంది.

వర్షాల కారణంగా గుంటూరు, పల్నాడు జిల్లాల్లో మున్సిపల్ ఎన్నికల ప్రచారం నెమ్మదించింది. గుంటూరు కార్పొరేషన్, తెనాలి, రేపల్లె, చీరాల మున్సిపాలిటీలతో పాటు పల్నాడు జిల్లాలో కొన్ని చోట్ల ఎన్నికలు జరుగుతున్నాయి. రోడ్ షోలు ఆగిపోయాయి. కొన్ని వాహనాలే మైకులు కట్టుకుని ప్రచారం చేస్తున్నాయి. అభ్యర్థులు సమావేశాలకు, ఇంటింటి ప్రచారానికి ప్రాధాన్యం ఇస్తున్నారు.

వర్షం ఇవాళ సాయంత్రం వరకు కొనసాగే అవకాశం ఉంది. తుఫాను బలహీనపడిన తర్వాతే వర్షాలు తగ్గుముఖం పడే అవకాశం ఉంది.