మురసు తుఫాను: ఏపీ ప్రభుత్వం అప్రమత్తం, కోస్తా రాయలసీమ జిల్లాలకు భారీ వర్ష హెచ్చరిక

మురసు తుఫాను ప్రభావంతో ఏపీ ప్రభుత్వం అప్రమత్తమైంది. ప్రాణ, ఆస్తి నష్టం జరగకుండా చర్యలు తీసుకోవాలని హోమ్ మంత్రి వంగలపూడి అనిత అధికారులను ఆదేశించారు.

రాష్ట్ర యంత్రాంగం 48 గంటల పాటు అప్రమత్తంగా ఉండాలని ఆమె ఆదేశించారు. ప్రభావిత జిల్లాల కలెక్టర్లతో ఆమె టెలీకాన్ఫరెన్స్ నిర్వహించారు. ఇవాళ, రేపు కోస్తా, రాయలసీమ జిల్లాల్లో భారీ నుంచి అతి భారీ వర్షాలు కురిసే అవకాశం ఉందని ఆమె తెలిపారు. ఎలాంటి ముప్పునైనా ఎదుర్కోవడానికి సిద్ధంగా ఉండాలని కలెక్టర్లకు సూచించారు.

విద్యుత్, మొబైల్ నెట్‌వర్క్ అంతరాయాలను వెంటనే పరిష్కరించాలని మంత్రి ఆదేశించారు. మత్స్యకారులు బోట్లు, వలలను సురక్షితంగా ఉంచుకునేలా అప్రమత్తం చేయాలని చెప్పారు. రాష్ట్ర విపత్తుల నిర్వహణ సంస్థ తుఫాను గమనాన్ని నిరంతరం పర్యవేక్షిస్తోందని, అధికారిక హెచ్చరికలు పాటించాలని ఆమె స్పష్టం చేశారు.

జలవనరుల శాఖ మంత్రి నిమ్మల రామానాయుడు సచివాలయం నుంచి ఇరిగేషన్ ఉన్నతాధికారులతో టెలీకాన్ఫరెన్స్ నిర్వహించారు. రిజర్వాయర్లపై నిరంతర నిఘా ఉంచాలని, ప్రతి రెండు గంటలకు ఒకసారి నీటి ప్రవాహాలను సమీక్షించాలని ఆయన ఆదేశించారు. ఈ సాయంత్రం నెల్లూరు, ఒంగోలు మధ్య తుఫాను తీరం దాటనున్న నేపథ్యంలో కృష్ణా, పెన్నా బేసిన్లలో అప్రమత్తంగా ఉండాలని సూచించారు.

ఉమ్మడి గుంటూరు, ప్రకాశం, నెల్లూరు జిల్లాల అధికారులు ప్రత్యేక దృష్టి పెట్టాలని మంత్రి ఆదేశించారు. నాగార్జున సాగర్ క్యాచ్‌మెంట్ ప్రాంతంతో పాటు గుండ్లకమ్మ, రాళ్లపాడు రిజర్వాయర్లకు వరద వచ్చే అవకాశం ఉందని ఆయన చెప్పారు. దీన్ని దృష్టిలో ఉంచుకుని ముందస్తు చర్యలు చేపట్టాలని సూచించారు. ఫ్లడ్ కంట్రోల్ సెల్ ఏర్పాటు చేసి ప్రజలను ఎప్పటికప్పుడు అప్రమత్తం చేయాలని ఆదేశించారు.