తూర్పు గోదావరిలో ప్రభుత్వ స్కూళ్లలో విద్యార్థుల సంఖ్య తగ్గుదల – ఇంగ్లీష్ మాధ్యమం, ప్రైవేట్ స్కూళ్లకే ప్రాధాన్యత

తూర్పు గోదావరి జిల్లా గ్రామీణ ప్రాంతాల్లోని ప్రభుత్వ ప్రాథమిక పాఠశాలల్లో విద్యార్థుల సంఖ్య గణనీయంగా తగ్గుతోంది. కొన్ని స్కూళ్లలో ఒకే ఉపాధ్యాయుడు, ఒకే విద్యార్థి ఉన్న పరిస్థితి నెలకొంది.

పిల్లలకు ఇంగ్లీష్ మాధ్యమంలో విద్య అవసరమని భావిస్తూ తల్లిదండ్రులు ప్రైవేట్ స్కూళ్ల వైపు మొగ్గు చూపుతున్నారు. గ్రామాల నుంచి పట్టణాలకు వలసలు, ప్రైవేట్ స్కూళ్లపై ఆసక్తి పెరగడం కూడా కారణాలుగా చెబుతున్నారు.

ప్రభుత్వం నాడు-నేడు, డిజిటల్ తరగతులు, మధ్యాహ్న భోజనం, ఉచిత పుస్తకాలు, యూనిఫామ్ వంటి సౌకర్యాలు కల్పిస్తున్నా ఆశించిన స్థాయిలో అడ్మిషన్లు పెరగడం లేదు. అంతేకాకుండా, 'తల్లికి వందనం' పథకం ప్రైవేట్ స్కూళ్లలో చదివే పిల్లలకూ వర్తిస్తోంది. దీంతో తల్లిదండ్రులు అటు వైపే మొగ్గు చూపే అవకాశం ఉంది.

పట్టణ ప్రాంతాల్లో మాత్రం ప్రభుత్వ పాఠశాలల్లో విద్యార్థుల సంఖ్య పెరుగుతోంది. కానీ గ్రామాల్లో ఇది వ్యతిరేకంగా ఉంది. ఇటీవల జరిగిన పదవ తరగతి పరీక్షల్లో తూర్పు గోదావరి జిల్లా ప్రభుత్వ పాఠశాల విద్యార్థులు ప్రథమ స్థానంలో నిలిచారు. ఈ విజయం వల్ల కొన్ని స్కూళ్లలో అడ్మిషన్లకు డిమాండ్ పెరిగింది.

ఈ నేపథ్యంలో, విద్యాశాఖ అధికారులు అడ్మిషన్ల ప్రక్రియ ఆశాజనకంగా ఉందని, ప్రైవేట్ స్కూళ్ల నుంచి వచ్చే విద్యార్థులకు సైతం ప్రభుత్వ పాఠశాలల్లో అడ్మిషన్లు కల్పిస్తున్నామని తెలిపారు. గతంతో పోలిస్తే ఈ సంవత్సరం ఎక్కువ అడ్మిషన్లు సాధించాలని ప్రయత్నిస్తున్నట్టు చెప్పారు.