మాజీ దౌత్యాధికారి దీపక్ వోహ్రా ప్రసంగం: భారత్ అభివృద్ధి, ఆత్మవిశ్వాసంతో ప్రపంచాన్ని ఆకట్టుకుంటోంది

న్యూఢిల్లీ: భారతదేశం ‘భారత్’గా రూపాంతరం చెందిందని, స్పష్టత, విశ్వాసం, వ్యూహాత్మక లక్ష్యంతో ప్రపంచాన్ని ఆకట్టుకుంటోందని మాజీ దౌత్యాధికారి దీపక్ వోహ్రా అన్నారు. నేషనలిస్ట్ కలెక్టివ్ కాన్క్లేవ్లో ఆయన ప్రసంగించారు.

వోహ్రా మాట్లాడుతూ, “ప్రధాని నరేంద్ర మోదీ నాయకత్వంలో భారత్ స్వీయవిశ్వాసం, ఆత్మగౌరవం పెంపొందించుకుంది. ఇకపై మనం పాశ్చాత్య అభిప్రాయాలను అంధంగా అనుసరించం” అని తెలిపారు.

పలు కీలక విజయాలను ఆయన గుర్తుచేశారు. ప్రపంచంలోనే అత్యాధునికమైన ఫాస్ట్ బ్రీడర్ రియాక్టర్ను భారత్ మాత్రమే వాణిజ్యపరంగా వినియోగిస్తోందని, ఇది ఇంధన రంగంలో విప్లవాత్మక మార్పు అని చెప్పారు. 2025 ఏప్రిల్‌లో చరిత్రలోనే అత్యధిక విద్యుత్ డిమాండ్ నెలకొన్నా గ్రిడ్ ఫెయిల్ కాలేదని, అందులో మూడో వంతు సౌరశక్తి నుండే వచ్చిందని వివరించారు.

డిజిటల్ రంగంలోనూ భారత్ అగ్రగామిగా నిలిచిందన్నారు. దేశంలో 138 కోట్ల స్మార్ట్‌ఫోన్లు ఉన్నాయని, ప్రతి సెకన్కు 6,600 డిజిటల్ లావాదేవీలు జరుగుతున్నాయని గణాంకాలు చెప్పారు. గతేడాది 12,000 కోట్ల క్యాష్‌లెస్ ట్రాన్సాక్షన్లు జరిగాయని, ఇది అమెరికా (300 కోట్లు), చైనా (1,700 కోట్లు) కంటే చాలా ఎక్కువని వెల్లడించారు.

మౌలిక సదుపాయాల్లో సాధించిన పురోగతిని కూడా ప్రస్తావించారు. రోజుకు 34 కి.మీ హైవేలు, 12 కి.మీ రైల్వే లైన్లు, 100 గంటల్లో 100 కి.మీ ఎక్స్‌ప్రెస్ వే నిర్మించడం వంటి రికార్డులను పేర్కొన్నారు. ఏడాదిలో యూరప్, అమెరికా కలిపి చేసే దానికంటే ఎక్కువ లోకోమోటివ్‌లను భారత్ తయారు చేస్తోందన్నారు.

దౌత్యపరమైన ఘనత గురించి మాట్లాడుతూ, “ఉక్రెయిన్-రష్యా మధ్య సంధి కుదిర్చాలని ప్రపంచం భారత్‌ను కోరింది. అదే మన దౌత్య ప్రతిష్ఠ” అని అన్నారు. 32 దేశాలు ప్రధాని మోదీకి తమ అత్యున్నత పౌర పురస్కారాలిచ్చాయని, అందులో 9 ముస్లిం దేశాలు ఉండటం గమనార్హమన్నారు.

యువతపై ఆశాభావం వ్యక్తం చేస్తూ, భారత మధ్యస్థ వయస్సు 25 ఏళ్లు మాత్రమేనని, ఈ జనాభా లాభం అభివృద్ధికి చోదక శక్తిగా నిలుస్తుందని వోహ్రా వివరించారు. 2047 నాటికి వికసిత భారత్ సాకారం కావడం ఖాయమని ఆత్మవిశ్వాసం వ్యక్తం చేశారు.